كريپتوۆاليۋتا قۇلدىرادى
كەشە عانا بيتكوين باعاسى 30 پروتسەنتكە تومەندەپ كەتتى. ارتىنشا وزگە سيفرلىق ۆاليۋتالار دا بىرىنەن سوڭ ءبىرى ارزانداي باستاعان. جۇرت كريپتواقشانى جاپپاي ساتا باستاعان سوڭ Binance پەن كوينبەيز كريپتوبيرجالارىندا تەحنيكالىق اقاۋ شىقتى. ءسويتىپ ساۋدا توقتاپ قالدى. كريپتوۆاليۋتانىڭ قۇنى ءتۇسىپ بارادى.
ۆيرتۋالدى اقشانىڭ ارزانداۋىنا قىتايدىڭ اتالعان ۆاليۋتانى تولەم قۇرالى رەتىندە پايدالانۋدان باس تارتۋى سەبەپ. بۇل شەشىمنىڭ نارىققا اسەر ەتكەنى سونشا، قازىر ءبىر بيتكويننىڭ باعاسى 40 مىڭ دوللاردان تومەندەدى. وسىدان ءبىر اي بۇرىن عانا ول 65 مىڭ دوللار شاماسىندا ساۋدالانعان ەدى.
داي سياوبو، ساراپشى:
- قىتايدىڭ كريپتوۆاليۋتانى زاڭداستىرماۋىنىڭ سەبەبى - ونى تولىققاندى باقىلاۋدا ۇستاۋ مۇمكىندىگىنىڭ جوقتىعىندا . قانداي دا ءبىر اۋىتقۋ بولا قالسا، بۇكىل ەل ەكونوميكاسى مەن قارجى نارىعى زيان شەگەدى. سونىمەن قاتار اقشانىڭ ءىزىن جاسىرۋ، جاسىرىن ساۋدا سەكىلدى قاۋىپتەر دە بار. يمپورت پەن ەكسپورت كەزىندە سالىقتان جالتارۋ ءۇشىن جاسالۋى مۇمكىن الاياقتىق ارەكەتتەر دە كەزدەسەدى.
كريپتواقشانىڭ كۇرت ارزانداۋىنا تۇرتكى بولعان تاعى ءبىر جايت - يلون ماسكتىڭ مالىمدەمەسى. تەسلا ونىمدەرىن ەندى بيتكوين ارقىلى ساتامىز دەگەن كاسىپكەر وتكەن اپتادا بۇل ويىنان اينىپ قالدى.
يلون ماسك، Tesla كومپانياسىنىڭ باس اتقارۋشى ديرەكتورى:
- Tesla كومپانياسى Bitcoin ارقىلى كولىك ساتۋدى توقتاتتى. Bitcoin ءوندىرىسى مەن ترانزاكتسيالارى ءۇشىن قازبا بايلىقتىڭ، اسىرەسە كومىردى قولدانۋدىڭ جىلدام وسەتىنى ءبىزدى الاڭداتادى. كريپتوۆاليۋتا كەرەمەت يدەيا جانە ءبىز ونىڭ بولاشاعى زور دەپ سانايمىز. ءبىراق بۇل قورشاعان ورتاعا زيان كەلتىرۋ ەسەبىنەن بولماۋعا ءتيىس. Tesla ەشقانداي Bitcoin ساتپايدى جانە ونىمەن بايلانىستى ترانزاكتسيالاردى تۇراقتى ەنەرگياعا كوشكەن كەزدە عانا قولدانباقپىز. سونداي- اق ءبىز Bitcoin ەنەرگياسىنىڭ %1 عانا قولداناتىن باسقا كريپتوۆاليۋتالاردى قاراستىرامىز.
وسى جازبادان كەيىن بيتكوين قۇنى 15 پروتسەنتكە تومەندەپ كەتتى. ىلە- شالا كريپتوۆاليۋتاعا بايلانىستى كومپانيالاردىڭ اكسيالارى دا ارزاندادى. سونىڭ سالدارىنان، كريپتوترەيدەرلەر قىرۋار قارجىدان قاعىلدى. وتكەن تاۋلىكتىڭ وزىندە كريپتوبيرجاداعى ماماندار 8 ميلليارد دوللاردان ايىرىلىپ قالعان. ەڭ كوپ شىعىن بيتكوينعا قاتىستى مامىلەلەردەن تۋىنداعان. سانعا سالساق، 3,4 ميلليارد دوللار. ەكىنشى ورىندا ەفيريۋم - 2,2 ميلليارد دوللار. قازىر ءىرى ينۆەستيتسيالىق كومپانيالار بيتكويننان باس تارتىپ، التىنعا كوشە باستاپتى.
www.24.kz