مۇنىڭ الدىندا تىلشىلەر دە، ارتىستەر دە شاراناسى كەپپەگەن كيىكتىڭ قۇرالايىن قۇشاقتاپ تۇسكەن سۋرەتتەرىن الەۋمەتتىك جەلىگە جارىسا جاريالاپ، ەلدىڭ نارازالىعىن تۋدىرعان ەدى.
«توميريس» فيلمىندە باستى ءرولدى سومداعان الميرا تۇرسىننىڭ كيىكتىڭ قۇرالايىن قۇشاقتاپ تۇسكەن سۋرەتى جۇرتتىڭ نارازىلىعىن تۋدىردى. اكتريسانىڭ ءوزى فوتوسسەسيانى قورشاعان ورتانى قورعاۋ مينيسترلىگىنىڭ رۇقساتىمەن جاساعانىن مالىمدەدى. ءتىپتى اقبوكەنگە زيان تيگىزبەس ءۇشىن ءتۇسىرىلىمنىڭ جەدەل وتكەنىن جانە ءتولدى اسا ساقتىقپەن ۇستاعانىن ايتادى. ال ماماندار كيىكتىڭ تولدەۋ كەزەڭىندە ادامنىڭ ءتۇز تاعىسىنا جۋىماعانى ءجون دەيدى.
ايتۋار تۋعانبەكوۆ، زوولوگ:
- ادام ءيىسى سىڭگەن ءتولدى ەنەسى ۇركىپ، باۋىرىنا الماي قويادى. وسى تۇسىرىلىمدە كورسەتىلگەن كيىك بالاسىنىڭ تەڭ جارتىسى ازىقسىز قالىپ ءولىپ قالۋى دا بەك مۇمكىن. فوتوسەسسياعا رۇقسات بەرگەن ەكولوگيا مينيسترلىگى الدىمەن تابيعات قورعاۋ پرينتسيپتەرىنە سۇيەنۋى كەرەك. ناقتىراق ايتساق، تابيعي پروتسەسكە بارىنشا كەدەرگى جاساماۋ كەرەك، اسىرەسە جانۋاردىڭ تولدەۋى كەزىندە بۇل ماسەلە ماڭىزدى. ال جاڭا تۋعان قۇرالايمەن سۋرەتكە ءتۇسۋ مۇنداي پرينتسيپكە ساي كەلمەيدى.
ال قورشاعان ورتانى قورعاۋ مينيسترلىگىنىڭ ءوز ءۋاجى بار. سالا ماماندارىنىڭ ايتۋىنشا، كيىك ءتولىن ادامنىڭ ۇستاعانىنان، وعان ەش زيان كەلمەيدى.
ءجۇسىپ قۋسايىن، قورىقشى:
- ءوزىم ەكى جىل بۇرىن بينوكلمەن قاراپ، كيىكتىڭ لاعىن قاشىپ بارا جاتىپ، ار جاعىنان اناسى كەلىپ سونى ەمىزگەن. ءوز كوزىممەن كورگەم.
قىزىل كىتاپقا ەنگەن كيىكتىڭ جاڭا تۋعان ءتولىن قۇشاقتاپ سۋرەتكە ءتۇسۋ كەيىنگى كەزدە سانگە اينالعان ءتارىزدى. وسىعان وراي ەكولوگيا مينيسترلىگى بەينە فوتو تۇسىرىلىمدەرگە تولىق توقتاۋ سالدى.
ايتا كەتەيىك، وسى سالاعا جاۋاپتى ەكولوگيا، گەولوگيا جانە تابيعي رەسۋرستار ءمينيسترىنىڭ ورىنباسارى بولعان ەرلان نىسانبايەۆ قىزمەتىنەن بوساتىلدى. ونىڭ ورنىنا ءاليا شالابەكوۆا تاعايىندالدى. ول وسىعان دەيىن ۆەدومستۆوعا قاراستى ترانسشەكارالىق وزەندەر دەپارتامەنتىن باسقارعان.