قازاقستاندىق جۇپتار دونور رەتىندە تۋىستارىنىڭ جىنىستىق جاسۋشاسىن پايدالانۋدى قالايدى

نۇر-سۇلتان. قازاقپارات - ەلىمىزدە بەدەۋلىگى بار جۇپتاردىڭ باسىم كوپشىلىگى دونور رەتىندە تۋىستارىنىڭ جىنىستىق جاسۋشاسىن پايدالانۋدى قالايدى.

بۇل جايىندا ءماجىلىس دەپۋتاتتارىنىڭ ساۋالىنا ق ر پرەمەر- ءمينيسترىنىڭ ورىنباسارى ەرالى توعجانوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«1995 -جىلدان باستاپ قازاقستاندا 85000 عا جۋىق ەرلى- زايىپتى قوسالقى رەپرودۋكتيۆتىك تەحنولوگيالار ادىستەرىمەن ەمدەلدى. قازىرگى ۋاقىتتا ەلدە 27 ەكستراكورپورالدىق ۇرىقتاندىرۋ (بۇدان ءارى – ە ك ۇ) ورتالىعى جۇمىس ىستەيدى. وسى ە ك ۇ باعدارلاماسىن ورىندايتىن مەديتسينا ورتالىقتارىندا جەكە دونورلار بازاسى بار. ءبىر مەديتسينا ورتالىعىنداعى دونورلار بازاسىنا تىركەلگەن جىنىستىق جاسۋشا دونورى، ەكىنشى مەديتسينا ورتالىعىنىڭ بازاسىنا تىركەلۋگە قۇقىعى جوق. قازىرگى تاڭدا ورتالىقتاندىرىلعان دونورلار بازاسىن قۇرۋ تۋرالى ماسەلە ارنايى مامانداردىڭ اراسىندا تالقىلانىپ، وسى باعىتتا قاجەتتى ءىس- شارالار جۇرگىزۋ قولعا الىنۋدا»، - دەلىنگەن ۇكىمەت باسشىسىنىڭ ورىنباسارىنىڭ جاۋابىندا.

ونىڭ جاۋابىندا، «جىنىستىق جاسۋشالاردىڭ، رەپرودۋكتيۆتىك اعزالار تىندەرىنىڭ دونورلىعىن جۇرگىزۋ قاعيدالارى مەن شارتتارىن بەكىتۋ تۋرالى» دەنساۋلىق ساقتاۋ ءمينيسترى بۇيرىعىنىڭ 1-تاراۋىندا ءبىر دونوردان 10 جىنىستىق جاسۋشا الىنعاننان كەيىن ازامات دونورلار بازاسىنان شىعارىلاتىندىعى ايتىلعان.

«25 جىلدىڭ ىشىندە ە ك ۇ باعدارلاماسىمەن 24000 نارەستە، سونداي-اق 100 جىنىستىق جاسۋشا دونورىنان 120 نارەستە دۇنيەگە كەلگەن. ول ە ك ۇ- مەن دۇنيەگە كەلگەن جالپى بالا سانىنىڭ 0,5 پايىزىن قۇرايدى. سونىمەن قاتار، ەلىمىزدە بەدەۋلىگى بار جۇپتاردىڭ باسىم كوپشىلىگى دونورلىق ە ك ۇ باعدارلاماسىن جۇرگىزۋ ءۇشىن دونور رەتىندە تۋىستارىنىڭ جىنىستىق جاسۋشاسىن پايدالانۋدى قالايدى»، - دەگەن ەرالى توعجانوۆ سۇراققا جاۋاپ بەرىپ.

اۆتور: مارلان جيەمباي