وزبەكستاندا ۇلتتىق پاراليمپيادا كوميتەتى قۇرىلدى
«پاراليمپيادالىق قوزعالىستى دامىتۋ بويىنشا قوسىمشا شارالار تۋرالى» ءتيىستى قاۋلىعا 18- مامىردا وزبەكستان پرەزيدەنتى شاۆكات ميرزيەيەۆ قول قويدى، دەپ حابارلايدى قازاقپارات ۋ ز ا- عا سىلتەمە جاساپ.
كوميتەت وزبەكستاننىڭ ۇلتتىق پاراليمپيادالىق قاۋىمداستىعى نەگىزىندە قۇرىلادى. پاراليمپيادالىق كوميتەتكە وزبەكستاننىڭ بارلىق وڭىرلەرى مەن قالالارىندا پاراليمپيادالىق سپورت ورتالىقتارى مەن كلۋبتارىن قۇرۋ، پاراليمپيادالىق سپورت تۇرلەرى بويىنشا جاتتىقتىرۋشىلاردى، نۇسقاۋشى-ادىسكەرلەردى جانە باسقا دا مامانداردى قايتا دايارلاۋدىڭ، بىلىكتىلىگىن ارتتىرۋدىڭ جانە كاسىبي دامىتۋدىڭ زاماناۋي جۇيەسىن ازىرلەۋ جانە ەنگىزۋ مىندەتى جۇكتەلگەن.
رەسپۋبليكادا پاراليمپيادالىق سپورت تۇرلەرى بويىنشا ماماندار دايارلاۋ ينستيتۋتى جانە وزبەك مەملەكەتتىك دەنە شىنىقتىرۋ جانە سپورت ۋنيۆەرسيتەتىنىڭ پاراليمپيادالىق فاكۋلتەتى قۇرىلادى.
«پاراليمپيا» كافەدراسى، سونداي-اق «بەيىمدەلگىش ساۋىقتىرۋ، دەنە تاربيەسى جانە سپورت» ماگيستراتۋرا ماماندىعى اشىلادى.
2021-جىلعى 1- قىركۇيەكتەن باستاپ وزبەكستاندا «بارلىعىنا ارنالعان سپورت» جوباسى ىسكە قوسىلادى. ونىڭ اياسىندا جىل سايىن 3- جەلتوقساندا - حالىقارالىق مۇگەدەكتەر كۇنى رەسپۋبليكالىق پاراسپورتتىق فەستيۆال وتكىزىلەدى دەپ جوسپارلانۋدا.