نۇر-سۇلتان قالاسىنىڭ باس مەملەكەتتىك سانيتارلىق دارىگەرىنىڭ قاۋلىسىنا سايكەس بۇگىندە قوعامدىق كولىكتە بەتپەردە تاعۋ رەجيمى قولدانىلادى.
كولىكتىك باقىلاۋ دەپارتامەنتىنىڭ قىزمەتكەرلەرى جولاۋشىلاردىڭ اۆتوبۋستاردا بەتپەردە تاعۋىن كۇندەلىكتى تەكسەرەدى.
وكىنىشكە قاراي، ماسكا تاقپايتىن، تاعۋدان باس تارتاتىن جولاۋشىلار كەزدەسەدى. جىل باسىنان بەرى كولىكتىك باقىلاۋ دەپارتامەنتىنىڭ قىزمەتكەرلەرى باس سانيتارلىق دارىگەردىڭ قاۋلىسىن بۇزعان 5 مىڭنان استام جولاۋشىنى انىقتادى. 1665 ادام اۆتوبۋستان ءتۇسىرىلدى.
«قۇرمەتتى جولاۋشىلار، قوعامدىق كولىكتە بەتپەردە تاعۋ رەجيمىن ساقتاۋ تۋرالى تاعى دا ەسكەرتەمىز. جول اقىسى تەك قولما- قول اقشاسىز تولەنەدى»، - دەلىنگەن دەپارتامەنت حابارلاماسىندا.