ۇلتتىق قوردان الىنعان قاراجات بولاشاق ۇرپاعىمىزدىڭ نەسىبەسىن جەپ قويۋمەن پارا-پار - دەپۋتات

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا دەپۋتات ازات سەمبينوۆ پرەمەر- ءمينيستردىڭ ورىنباسارى ءاليحان سمايلوۆقا دەپۋتاتتىق ساۋال جولداپ، وندا ۇلتتىق قورداعى قاراجات ماسەلەسىن كوتەردى، دەپ حابارلايدى قازاقپارات.

دەپۋتاتتىڭ ايتۋىنشا، بيىلعى بيۋدجەتتى ناقتىلاۋ كەزىندە، شىعىستاردى وتەۋدىڭ نەگىزگى كوزدەرىنىڭ ءبىرى - قايتادان ۇلتتىق قوردىڭ 850 ميلليارد تەڭگە سوماسىنداعى قاراجاتى بولدى.

«جالعاسىپ جاتقان «كوروناكريزيس» جانە ,6 مۇنايسىز بيۋدجەتتىڭ تاپشىلىعى جاعدايىندا بۇل شەشىمدى ماقۇلداۋعا ءماجۇر بولدىق. سونىمەن قاتار، ۇلتتىق قوردان الىنعان قاراجات، ەلىمىزدىڭ بولاشاق ۇرپاقتارىنىڭ نەسىبەسىن جەپ قويۋمەن پارا-پار. «اق جول» فراكسياسى بىرنەشە رەت نورۆەگيا مۇناي قورىنىڭ تاجىريبەسىنە سۇيەنۋگە شاقىرعان، ياعني، اعىمداعى بيۋدجەتتىك قارجىلاندىرۋعا ينۆەستيتسيالىق تابىستىڭ بەلگىلى ءبىر بولىگى عانا باعىتتالۋى مۇمكىن، ال نەگىزگى جيناققا ەشكىم قول سۇعا المايدى. مىسالى، الدىڭعى داعدارىستان كەيىن نورۆەگيا ءوزىننىڭ مۇناي قورىنىڭ بار- جوعى 1-اق پروتسەنتىن جۇمساعان. ال قازاقستاننىڭ ۇلتتىق قورىنان سول كەزدە 83 ميلليارد دوللار جۇمسالعان» دەدى دەپۋتات بۇگىنگى ءماجىلىس وتىرىسىندا.

ونىڭ ايتۋىنشا، 2001-2015 -جىلدارى ۇلتتىق قورعا 147 ميلليارد دوللار ءتۇسىم تۇسكەن. دەمەك قازاقستان بۇگىنگى داعدارىسقا دەيىن ۇلتتىق قوردىڭ جارتىسىنان استامىن جۇمساپ قويعان.

«اق جول» فراكسياسى ەلىمىزدىڭ بولاشاق ۇرپاقتارىنىڭ يگىلىگىن ىسىراپ ەتۋدى ءجونسىز دەپ سانايدى. اسىرەسە، بۇل شىعىندار، اياقتالماعان قۇرىلىس وبەكتىلەرىنىڭ باعالارىنان باستاپ، وقۋشىلارعا بولىنگەن نوۋتبۋكتەردى ۇرلاۋعا دەيىنگى جەمقورلىقپەن بايلانىستى بولسا. وسى نەگىزدە «اق جول» فراكسياسىنىڭ دەپۋتاتتارى ۇلتتىق قوردى ساقتاۋ جانە ونى جيناقتاۋ فۋنكسياسىن ىسكە اسىرۋ ماقساتىندا، ايتىلعان كەمشىلىكتەردى ەسكەرە وتىرىپ، ۇلتتىق قوردى قالىپتاستىرۋ جانە پايدالانۋ تۇجىرىمداماسىن قايتا قاراۋدى ۇسىنادى» دەپ اتاپ ءوتتى ازات سەمبينوۆ.