جول ءجۇرۋ تاريفتەرى جاقىن ارادا كوتەرىلە مە
بۇل تۋرالى قازاقستان اۆتوكولىكشىلەر وداعىنىڭ باسشىسى ءسابيت امانبايەۆ ايتىپ بەردى، دەپ حابارلايدى قازاقپارات.
«شاعىن سۋبسيديالار سالدارىنان اۆتوپاركتەر قانشالىقتى ۇتىلىپ جاتىر؟ تاريفتەردى كوتەرەتىن مۇمكىندىك جوق پا؟» - دەپ سۇراق قويدى مودەراتور.
«جول ءجۇرۋ تاريفتەرىن زاڭ بويىنشا جەرگىلىكتى اتقارۋشى ورگان بەلگىلەيدى. تاسىمالداۋشىنىڭ ءوزى كوتەرە المايدى. وزدەرىڭىز بىلەتىندەي، بۇل تاريفتەر حالىقتىڭ الەۋمەتتىك وسال توپتارى ءۇشىن قولجەتىمدى بولۋى ءتيىس. جاقىن ارادا تاريفتەردى كوتەرۋ تۋرالى ەش اڭگىمە بولمايدى»، - دەپ ءتۇسىندىردى ءسابيت امانبايەۆ «Kazinform» الاڭىندا «قوعامدىق كولىكپەن جولاۋشىلار تاسىمالداۋداعى باسەكەلەستىك» اتتى جيىندا.
شاعىن سۋبسيديا سالدارىنان اۆتوپاركتەر شىعىن تۋرالى سۇراققا وداق باسشىسى «حالىق قانشا شىعىنعا ۇشىراپ جاتىر؟» دەپ جاۋاپ بەردى.
«بىزدە سۋبسيديا بولماعاندىقتان، قوزعالىس قاۋىپسىزدىگى، الدىن الۋ جۇمىستارى جوق. سوندىقتان ءبىز جول ۇستىندەگى ءولىم-ءجىتىم بويىنشا ءبىرىنشى ورىندا تۇرمىز، اۆتوپارك جاڭارتىلماعان. نەلىكتەن ءجۇرۋ كەستەلەرى بۇزىلادى؟ بىزدە جۇرگىزۋشى جەتىسپەيدى، ويتكەنى ءبىز ولارعا لايىقتى جالاقى تولەمەيمىز. سوندىقتان سۋبسيديا ماسەلەسى كەزدەيسوق قويىلىپ وتىرعان جوق. ۇكىمەتتىڭ وكىمىمەن بۇل ماسەلە شارالار كەشەنىندە ءبىرىنشى ورىنعا قويىلدى. سۋبسيديالاۋ قازىرگى ۋاقىتتا پروبلەمالاردى شەشۋدىڭ بىردەن-ءبىر جولى»، - دەيدى ءسابيت امانبايەۆ.