بۇل تۋرالى ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى قازاقپارات ءتىلشىسى.
«جالعان ۆاكسيناتسيا قۇجاتىنا قاتىستى ايتار بولسام، مۇنداي جايت بولدى. ول العاش رەت تىركەلدى. اقپاراتتى الا سالىسىمەن الماتى اكىمدىگىمەن بايلانىسقا شىقتىم. تاڭەرتەڭنەن-اق باقىلاۋعا الىپ، كۇشتىك قۇرىلىمدارمەن جۇمىس ىستەدىك، قولعا تۇسىردىك»، - دەدى الەكسەي سوي ورتالىق كوممۋنيكاتسيالار الاڭىندا وتكەن باسپا ءسوز ءماسليحاتى بارىسىندا.
ونىڭ اتاپ وتۋىنشە، الەۋمەتتىك جەلىدەگى مۇنداي اقپاراتقا مونيتورنيگ جاسالىپ، جان-جاقتى تەكسەرىلەدى.
«ەگەر سىزدەردە وسىنداي جاعدايلارعا قاتىستى اقپارات بولسا، وندا ونى قابىلداۋعا دايىنبىز. قاتاڭ ارەكەت جاسايتىن بولامىز. بارلىق مەديتسينا قىزمەتكەرلەرىنە بۇل قىلمىستىق جازالاتىن جاعداي ەكەندىگىن ەسكەرتتىك. دارىگەر، ءتىپتى ونىڭ جانىندا بولعان كەز كەلگەن ازامات مۇنداي جاعدايدا زاڭ بار ەكەندىگىن ءتۇسىنۋى ءتيىس. مۇنىڭ بارلىعى دا ناقتى دالەلدەنەدى. ويتكەنى، ءاربىر دوزا اقپاراتتىق جۇيەدە كورىنىپ تۇرادى. ەگەر، مۇنداي جايت ورىن الاتىن بولسا، وندا قىلمىستىق جازاعا تارتىلادى»، - دەدى دەنساۋلىق ساقتاۋ ءمينيسترى.