پرەزيدەنت تاپسىرماسى: ءبىلىم بەرۋگە ۇلتتىق سپورت تۇرلەرىنەن مىندەتتى كومپونەنتتەر ەنگىزىلدى
مەملەكەت باسشىسى قاسىم-جومارت توقايەۆ وتكەن جىلى جاريا ەتكەن «جاڭا جاعدايداعى قازاقستان: ءىس- قيمىل كەزەڭى» اتتى جولداۋىندا: «بۇقارالىق سپورتقا، دەنە تاربيەسىنە جانە بالالارعا باسىمدىق بەرۋ كەرەك. ءار وبلىستا، ءىرى اۋدان ورتالىقتارىندا سپورت ۇيىرمەلەرىن اشۋ قاجەت»، - دەپ اتاپ وتكەن بولاتىن.
ال پرەزيدەنت باسپا ءسوز حاتشىسى دەنە شىنىقتىرۋ پەن بۇقارالىق سپورتتى دامىتۋ جونىندە 2020-2025 -جىلدارعا ارنالعان كەشەندى جوسپار قابىلدانعانىن جازدى.
بەرىك ءۋاليدىڭ مالىمەتىنشە، ەلىمىزدە دەنە شىنىقتىرۋمەن جانە سپورتپەن جۇيەلى تۇردە اينالىساتىندار سانى 5,9 ميلليون ادامعا جەتتى، ونىڭ 560908 ى - بالالار مەن جاسوسپىرىمدەر. 127703 سپورت سەكتسياسى، بالالار مەن جاسوسپىرىمدەرگە ارنالعان 477 سپورت مەكتەبى، سونداي-اق بالالار مەن جاسوسپىرىمدەردىڭ 686 دەنە شىنىقتىرۋ كلۋبى جۇمىس ىستەيدى. بالالار مەن جاسوسپىرىمدەر دەنە شىنىقتىرۋ كلۋبتارى مەن دارىگەرلىك- دەنە شىنىقتىرۋ ديسپانسەرلەرىنىڭ جەلىسى كەڭەيتىلدى. ءبىلىم بەرۋدىڭ بارلىق دەڭگەيىندە دەنە تاربيەسى ساباقتارىندا ۇلتتىق سپورت تۇرلەرى بويىنشا مىندەتتى كومپونەنتتەر ەنگىزىلدى. ءاربىر اۋىلدىق وكرۋگ ءۇشىن سپورت جونىندەگى 3 مىڭ نۇسقاۋشى بەلگىلەندى.
اۆتور: مارلان جيەمباي