ەسىك قالاسىندا پەرزەنتحانا ماڭىنان ادام سۇيەكتەرى شىعىپ جاتىر

تالدىقورعان. قازاقپارات - الماتى وبلىسىنىڭ ەڭبەكشىقازاق اۋدانىندا ادامنىڭ سۇيەكتەرى تابىلدى، دەپ حابارلايدى قازاقپارات ءتىلشىسى.

بۇل وقيعا جايلى ۆيدەو الەۋمەتتىك جەلىگە تارادى. بەينەجازبا اۆتورى ەسىك قالاسىنداعى پەرزەنتحانا ماڭىنان ادامنىڭ سۇيەكتەرى تابىلعانىن ايتادى. ۆيدەودان ادامنىڭ باس سۇيەگىن كورۋگە بولادى.

«بالكىم بۇل جەردە قورعان بولعان شىعار» دەپ پىكىر بىلدىرەدى ۆيدەو اۆتورى. ەڭبەكشى قازاق اۋدانى اكىمىنىڭ باسپا ءسوز قىزمەتى قازاقپارات تىلشىسىنە وقيعانىڭ ءمان- جايىن ءتۇسىندىردى. «سۇيەكتەر ەسىك قالاسىنىڭ جانىندا ورنالاسقان بولەك اۋىلدىق وكرۋگىنەن تابىلدى.

بۇل جەر «روماشكا» دەپ اتالاتىن ساياجاي. ول سۇيەكتەر اشىق- شاشىق شاشىلىپ جاتقان جوق. جەردى قازۋ بارىسىندا شىققان. ءدال وسى جەردە سۋ قۇبىرىن جۇرگىزۋ جۇمىسى جۇرگىزىلىپ جاتىر.

سۇيەكتى تاپقان دا - سول مەكەمەنىڭ جۇمىسشىلارى. قازىر «التىن ادام» مۇراجايىنىڭ ارحەولوگتارى وقيعا ورنىنا كەلدى. سۇيەكتەردى جيناپ، ساراپتاماعا جىبەرەدى» دەپ ءمالىم ەتتى اتالعان ۆەدومستۆونىڭ باسپا ءسوز قىزمەتى.