مەملەكەتتىك ءتىلدىڭ بىرىكتىرۋشى رولىنە توقتالعان ەلباسى، «بۇل پروتسەسس بارشا الەمدە تابيعي قۇبىلىس. سوندىقتان قازاق ءتىلىن ءتۇسىنىپ، مەڭگەرۋگە دەگەن تالپىنىستى قولداپ، بارشا جەردە ىنتالاندىرۋىمىز كەرەك»، - دەدى.
وسى ورايدا ن. نازاربايەۆ قازاقستان حالقى اسسامبلەياسى بۇل باعىتتا ەلەۋلى ءرول اتقارىپ كەلە جاتقانىن اتاپ ءوتتى. ق ح ا جۇمىسى اياسىندا وزگە ۇلت وكىلدەرى قازاق ءتىلىن جاقسى مەڭگەرىپ الدى.
«بۇل باعىتتاعى تالپىنىستى بايقاپ وتىرمىز. قانشاما جاستار اسسامبلەيا اتىنان ومىرگە جولداما الدى. اسسامبلەيا اينالاسىنداعى جۇمىس بارىسىندا مەملەكەتتىك ءتىلدى مەڭگەرۋگە مۇمكىندىك جاسالدى. قازىرگى كەزدە بۇل ادامدار جاۋاپتى قىزمەتتەردە ءجۇر، بىرنەشە تىلدە ەمىن- ەركىن سويلەي الادى»، - دەدى ەلباسى.
بۇدان بۇرىن حابارلانعانداي، بۇگىن ەلباسىنىڭ توراعالىعىمەن قازاقستان حالقى اسسامبلەياسىنىڭ «بىرلىكتىڭ، تاتۋلىق پەن كەلىسىمنىڭ 30 جىلى» اتتى XXIX سەسسياسىنىڭ جۇمىسى باستالدى. نۇرسۇلتان نازاربايەۆ الەم ەلدەرىنىڭ قازاقستانعا قاتىستى سەنىمى تۋرالى پىكىر ءبىلدىردى.
اۆتور: رۋسلان عابباسوۆ