«ماڭعىستاۋ وبلىسىندا قىزىل كىتاپقا ەنگەن ءۇستىرت ۋريالدارىن بىرنەشە اپتاعا سوزىلعان ۇزدىكسىز ىزدەۋ ناتيجەسى ءساتتى اياقتالدى. وسىناۋ تاڭقالارلىق تىرشىلىك يەسىن ىزدەپ تابۋعا كومەكتەسكەن دوستارىما ۇلكەن ريزاشىلىعىمدى بىلدىرەمىن. تىك جارتاستاردان ەمىن- ەركىن جوڭكىگەن وسىناۋ اڭداردى سىرتتاي باقىلاۋ شەكسىز ءلاززاتقا بولەيدى. جاس تولدەرى سانىنىڭ كوپ ەكەندىگى دە قۋانتادى. دەمەك، ءبارى جونىمەن دەگەن ءسوز»، - دەپ جازدى ازامات سارسەنبايەۆ Facebook پاراقشاسىندا.
ءۇستىرت ۋريالى قازاقستاننىڭ قىزىل كىتابىنا ەنگەن. ولاردىڭ جويىلىپ كەتۋ قاۋپى بار. بۇل جانۋاردىڭ مەكەندەيتىن جەرىندە ادامدار دا كوپ جۇرەدى. ءبىراق، سوڭعى جىلدارى ولاردىڭ سانى ارتىپ جاتىر. ۋريالدار تەڭىز دەڭگەيىنەن 6000 مەتر بيىك ورنالاسقان تاۋ بوكتەرىندە مەكەندەيدى. كەيدە، قۇرعاق، ورمان جانە اۋىل شارۋاشىلىعى ورنالاسقان نىسانداردىڭ قاسىندا ءومىر سۇرەدى. ولار كوبىنەسە قازاقستاننىڭ وڭتۇستىك- باتىسىندا، وزبەكستاندا، تۇرىكمەنستاندا، تاجىكستاندا، اۋعانستاندا، پاكىستاندا، يران جانە ءۇندىستان سياقتى ەلدەردە كەزدەسەدى.