رەسەيدەگى حالىقارالىق تۋرنيردە ءتورت بوكسشى فينالعا شىقتى

نۇر- سۇلتان. قازاقپارات - رەسەيدە بوكستان سانكت- پەتەربۋرگ گۋبەرناتورىنىڭ كۋبوگىندا فينالعا شىققان قازاقستاندىقتار بەلگىلى بولدى، دەپ حابارلايدى قازاقپارات ءتىلشىسى.

ەستەرىڭىزگە سالا كەتەلىك، جارتىلاي فينالعا ەلىمىزدەن جەتى بوكسشى جولداما العان ەدى. ولاردىڭ اراسىنان تورتەۋى جارىستى جالعاستىرۋعا مۇمكىندىك السا، ۇشەۋى قولا جۇلدەنى قاناعات تۇتتى. فينالعا شىققان ءتورت بوكسشىنىڭ ۇشەۋى رەسەيلىك قارسىلاستارىمەن قولعاپ ءتۇيىستىردى. اتاپ ايتقاندا، ماحمۋد سابىرجان (52 كەلى) ۆاسيلي ەگوروۆتان، ءابىلحان امانقۇل (75) كەلى اندرەي كوۆالچۋكتەن، بەكزات نۇرداۋلەتوۆ (81 كەلى) اندرەي كومەنكوۆتەن مىقتى ەكەنىن دالەلدەدى. ال، اسلانبەك شىمبەرگەنوۆ (69 كەلى) وزبەكستاندىق بوبو- ۋسمون باتۋروۆتان ايلاسىن اسىردى.

ايتا كەتەيىك، حالىقارالىق تۋرنيردە الەمنىڭ 15 ەلىنەن 100 گە جۋىق بوكسشى كەلدى. قازاقستان اتىنان جارىسقا 9 سالماقتا 10 بىلعارى قولعاپ شەبەرى اتتاندى.