گەرمانيا كاسىپكەرلەرى قاراعاندى وبلىسىندا بولات وندىرىسىنە ينۆەستيتسيا سالماق

قاراعاندى. قازاقپارات - قاراعاندى وبلىسىنىڭ اكىمى جەڭىس قاسىمبەك گەرمانيا فەدەراتيۆتىك رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى تيلو كليننەردى قابىلدادى.

كەزدەسۋدە ءوڭىر مەن گەرمانيا اراسىنداعى ىنتىماقتاستىقتى دامىتۋ ماسەلەلەرى تالقىلاندى، دەپ حابارلايدى قازاقپارات ءتىلشىسى.

«قاراعاندى وبلىسىندا گەرمانيالىق كومپانيالارمەن بىرلەسكەن كاسىپورىندار سانى جىل سايىن ارتىپ كەلەدى. بۇگىندە ولاردىڭ سانى 120 عا جەتكەن. كاسىپورىندار ساۋدا، اۋىل شارۋاشىلىعى، تاۋ- كەن جانە وڭدەۋ ونەركاسىبى، كولىك، ءبىلىم بەرۋ، كاسىبي جانە عىلىمي قىزمەت سياقتى تاعى دا باسقا سالالاردا جۇمىس ىستەيدى. سوڭعى ۋاقىتتا وبلىستا گەرمانيا كاپيتالىنىڭ قاتىسۋىمەن ءبىرقاتار ءىرى جوبالار ىسكە اسىرىلا باستادى. ولاردىڭ قاتارىندا «Linde Gas Kazakhstan» ج ش س ونەركاسىپتىك گاز ءوندىرۋ زاۋىتى، ساران قالاسى مەن اعادىر كەنتىندە كۇن ەلەكتر ستانتسيالارىن سالۋ سياقتى ماڭىزدى جوبالار بار. ءبىز نەمىس كومپانيالارىن تارتۋعا مۇددەلىمىز. گەرمانيا ءبىز ءۇشىن ستراتەگيالىق ساۋدا- ەكونوميكالىق جانە مادەني ارىپتەس بولىپ تابىلادى»، - دەدى جەڭىس قاسىمبەك.

ءوڭىر باسشىسى «سارىارقا» ازات ەكونوميكالىق اۋماعىندا 2014 -جىلدان باستاپ گەرمان كاپيتالىنىڭ قاتىسۋىمەن ەكى زاۋىت - «بەمەر ارماتۋرا» جانە «يزوپليۋس تسەنترالنايا ازيا» جۇمىس ىستەيتىنىن ەسكە سالدى. ايماق باسشىسى نەمىس بيزنەسىن ساران قالاسىندا قۇرىلعان جاڭا يندۋستريالىق ايماقتا ىنتىماقتاستىققا شاقىردى.

«وبلىستا 32 مىڭنان استام ەتنيكالىق نەمىستەر تۇرادى»، دەپ اتاپ ءوتتى جەڭىس قاسىمبەك. وتكەن جىلى ءوڭىردىڭ گەرمانيامەن سىرتقى ساۋدا اينالىمى 71,3 ميلليون ا ق ش دوللارىن قۇرادى. كەزدەسۋدە مالىمدەلگەن كولەمدى ۇلعايتۋ مۇمكىندىكتەرى بار.

«مەن مەتاللۋرگيا سالاسىنداعى ىنتىماقتاستىقتىڭ جاڭا مۇمكىندىكتەرىن تالقىلاۋ ماقساتىندا كەلدىم. قاراعاندى وبلىسىندا ىسكەرلىك سەرىكتەستىكتى كەڭەيتۋگە مۇمكىندىك بەرەتىن كاسىپورىندار كلاستەرى بار. گاز ءوندىرىسىن كەڭەيتۋ جوسپارلارى بار. بۇگىن مەن «ارسەلورميتتال تەمىرتاۋ» باسشىلىعىمەن كەزدەسەمىن. دايىندىق كەزەڭىندە نەمىس بيزنەسى قاتىسۋعا دايىن جوبا بار. بولاشاقتا «جاسىل» بولات شىعارۋعا اۋىسۋعا بولادى. بۇل ەكولوگيانى جاقسارتۋعا كومەكتەسەدى»، - دەدى تينو كليننەر مىرزا.

ەلشى وسى جوبانى قاراۋ، ماسەلەلەردى پىسىقتاۋ جانە شەشىم قابىلداۋ ءۇشىن جۇمىس توبىن قۇرۋدى ۇسىندى.

«جالپى بۇل ءبىز ءۇشىن وزەكتى. ءبىز ىنتىماقتاسۋعا دايىنبىز»، - دەپ سەندىردى جەڭىس قاسىمبەك.

اكىممەن كەزدەسۋدەن كەيىن ەلشى تەمىرتاۋعا بەت الدى. ول «ارسەلورميتتال تەمىرتاۋ» جانە تەمىرتاۋ جوعارى پوليتەحنيكالىق كوللەدجىنە بارادى. وقۋ ورنىندا دۋالدى وقىتۋدىڭ نەمىس مودەلى نەگىزىندە ماماندار دايارلاۋ بويىنشا جوبا ىسكە اسىرىلادى.