«جاقىندا «Be with me « اتتى جاڭا بەينەبايانىمنىڭ جارىققا شىعاتىنى تۋرالى جاڭالىقپەن بولىسكەنىمە قۋانىشتىمىن! جارقىن ەموتسيالاردىڭ ۇيلەسىمى، درايۆ جانە باستى كەيىپكەردىڭ باتىلدىعى - بۇل ەرەكشە فورمات. جاڭا وقيعا - جاڭا مەن! پرەمەرانى جىبەرىپ الماۋ ءۇشىن مەنىڭ بارلىق الەۋمەتتىك جەلىلەرىمدەگى جاڭالىقتاردى قاداعالاڭىزدار»، - دەپ جازدى ءانشى ءوزىنىڭ Instagram پاراقشاسىندا.
«Be With Me « ءانى العاش رەت 2021-جىلعى 17 - قاڭتاردا امەريكاندىق TIXR ستريمينگ پلاتفورماسىنداعى «Dimash Digital Show» ونلاين- كونسەرتىندە شىرقالعان ەدى. ءان ءماتىنىن دجوردان اراكەليان مەن داۋرەن شامۇراتوۆ جازعان.
دجوردان نەگىزگى اعىلشىنشا ماتىندە جازسا، داۋرەن قازاقشا رەپ ءماتىنىن شىعاردى.
Dimashnews پورتالىنىڭ جازۋىنشا، «Be With Me « ءانىن ديماشتىڭ ءوزى ارلەگەن. اۋەلى دەمونۇسقاسىن نوبايلاپ، كەيىن وعان قۇرمانعازى اتىنداعى قازاق مەملەكەتتىك حالىق اسپاپتارى وركەسترىنىڭ باس ديريجەرى ابىلاي تىلەپبەرگەنوۆ ويناعان دومبىرا پارتياسىن قوسقىزعان.
ديماش اندەرىنىڭ تۇراقتى وڭدەۋشىسى، ساۋند-پروديۋسەر ەرلان بەكشۋرين دەموجازبانىڭ مانەرىن وزگەرتىپ، باستاپقى قۇرىلىمى مەن باس اۋەنىن ساقتاي وتىرىپ، قوسىمشا ىرعاقتار قوسىپتى.
وسىدان كەيىن ول ءادىلجان تولىقپايەۆتى شاقىرىپ، دومبىرا پارتياسىن قايتا جازىپ شىققان. بۇل تاندەمگە كومپوزيتور رەنات گايسين قوسىلىپ، كلاۆينەت پەن ۇرمەلى اسپاپتار پارتياسىن كىرگىزگەن.
ماسكەۋلىك مۋزىكانت مارسەل حاكيموۆ باس پارتياسىن قايتا جازىپ شىعادى.