بىرەۋى قارعاعا قاز ىلدىرەمىن دەپ ماقتانسا، ەكىنشىسى مەن شوجە تورعايعا قاراقۇيرىق الدىرامىن دەپتى. باسكە كۋا بولعاندار تاڭقالىسىپتى، قازدى قارقىلداعان قارعا السا، جاس قىزدىڭ جۇدىرىعىنداي شوجە تورعاي قاراقۇيرىققا تۇسسە، وندا زامان نە بولعان دەسىپ كۇڭكىلدەسەدى.
ول كەزدە قۇس سىناۋ كۇزدە، قۇس قايتار كەزدە بولادى ەكەن. قارا قارعاعا قاز ىلدىرەمىن دەگەن قۇسبەگى كوكتەمدە قارا قارعانىڭ ەكى بالاپانىن ۇيادان الىپ باعادى. قازدى اتىپ الىپ، ونىڭ تەرىسىنىڭ ىشىنە ءجۇن تىعىپ، ءتىرى قازعا ۇقساتىپ، كەپتىرەدى. قارعانىڭ بالاپاندارىنا جەمدى سونىڭ باسىنان جەگىزەدى. بالاپاندار وسە كەلە قازدىڭ كەپكەن تۇلىبىن كورسە تاپ بەرىپ باسىپ، جەم ىزدەيتىن بولادى.
ەكىنشى قۇسبەگى قاراقۇيرىقتىڭ بىرەۋىن ۇستاپ الىپ، باعىپ وسىرەدى دە، ءبىر ۇيا شوجە تورعايدىڭ بالاپانىن قولعا ۇيرەتىپ، تارىنىڭ ءدانىن قاراقۇيرىقتىڭ باسىنا سەۋىپ بەرىپ جەگىزەدى. سوعان داعدىلانعان شوجە تورعايلار قاراقۇيرىق كورسە بولدى سوعان ۇمتىلاتىن بولادى. شوجە تورعايلاردى توردىڭ ىشىنە ۇستاپ، تەك ءدان سەبەر كەزدە عانا شىعارادى. وسىلاي باستەسكەن ەكى قۇسبەگى دە جاز بويى دايىندىق جاساپ، تورعاي مەن قارعاسىن ۇيرەتە بەرەدى.
كۇزدە باستەسكەن قۇسبەگىلەردىڭ ونەرىن كورۋگە كوپ ادام جينالادى. قارعانىڭ باستاۋشىسى: «جەكە قازعا عانا قارعالارىمدى جىبەرەمىن»، — دەپ وڭاشا ىزدەپ اۋرەلەنەدى. اقىرى ءساتى ءتۇسىپ جەكە كەلە جاتقان قاز كەزدەسىپ، سوعان ۇيرەتىلگەن ەكى قارعاسىن قوسىپ جىبەرەدى. ءبىر كۇننەن بەرى جەم جەمەگەن اش قارعالار قازدى كورگەندە ۇمتىلا ۇشادى، قازعا جەتىپ، ونىڭ باسىنان جەم ىزدەپ قۇياقتارىمەن ءتۇيىپ، جىبەرمەي ەسىن شىعارادى، قۇتىلا الماعان قاز ىعا ۇشىپ، قامىستىڭ اراسىنا بارىپ تىعىلادى. سول مەزەتتە قۇسبەگىنىڭ ۇيرەتىلگەن تازىسى بارىپ، قامىسقا قورعالاعان قازدى اۋزىمەن تىستەپ الىپ كەلەدى. ەل قۇسبەگىنىڭ ونەرىنە ءدان ريزا بولادى.
بۇدان سوڭ ەل ەكىنشى قۇسبەگىنىڭ ونەرىن كورۋگە كەلەدى. ول تورعا قاماپ ۇستاپ وتىرعان شوجە تورعايلارىن الىپ شىعىپ، جەكە قاشقان قاراقۇيرىققا قويا بەرەدى. ءبىر توپ تورعاي قاراقۇيرىقتىڭ باسىما ۇيمەلەپ، جەم ىزدەپ شۇپىرلەپ قاراقۇيرىقتى جۇرگىزبەيدى. سول كەزدە اڭشىنىڭ تازىسى بارىپ قاراقۇيرىقتى ۇستايدى. ەكەۋىنىڭ ونەرىن تاماشالاپ، ريزا بولعان جۇرت تەڭ تۇستىڭدەر دەپ جاريالاپ، العىس ايتىپتى.
massaget.kz