بۇل قاشاعان كەن ورنىنا كەمە قاتىناسىن جاقسارتادى. الايدا ەكولوگتار تەرەڭدەتۋ جۇمىستارى سۋ ايدىنىنىڭ بيوالۋان تۇرلىلىگىنە كەرى اسەرىن تيگىزەدى دەپ، الاڭداپ وتىر. ۋاقىت وتە كەلە كاسپي تەڭىزى ارالدىڭ كۇيىن كەشۋى مۇمكىن. سوڭعى 13 جىلدا كاسپي تەڭىزىنىڭ سولتۇستىك بولىگىندەگى سۋ دەڭگەيى 1,5 مەترگە دەيىن تومەندەگەن. قاشاعان كەن ورنىن يگەرىپ وتىرعان كومپانيا قىزمەتكەرلەرىنىڭ ايتۋىنشا، تەڭىز ءتۇبى تەرەڭدەتىلمەسە، الداعى 5 جىل ىشىندە مۇناي ءوندىرىسى تۇرالاپ قالۋى ابدەن مۇمكىن. جۇك كەمەلەرىنىڭ قاتىناۋى قيىندايدى. الايدا تەرەڭدەتۋ جۇمىستارى سۋ ايدانىنداعى بيوالۋانتۇرلىلىككە كەرى اسەرىن تيگىزەدى دەيدى ەكولوگتار.
ارمان حايرۋللين، ەكولوگ:
- تەڭىز تۇبىندەگى سۋ ءتۇبى تۇنعان بەنتۋس. زووبەنتۋسى بار، باسقاسى بار. مۇنىڭ بارلىعى بالىقتىڭ ازىقتىق قورى. ەگەر قازاتىن بولسا، ءبىر مەزەت وسىنىڭ ءبارى ولەتىن بولادى. بالىق شارۋاشىلىعىنا ۇلكەن كەرى اسەرىن تيگىزەدى دەپ ەسەپتەيمىن. مۇنى ناقتى زەرتتەمەي تۇرىپ، بۇل جۇمىستاردى باستاۋ ءالى ەرتە دەپ سانايمىن.
مۇناي ءوندىرۋ كومپانياسى قىزمەتكەرلەرىنىڭ ايتۋىنشا، تەرەڭدەتۋ جۇمىستارى كەزىندە قورشاعان ورتاعا ەشقانداي زيان كەلمەيدى. بۇل جوبانى جۇزەگە اسىرۋ ءۇشىن تالداۋ جۇرگىزىلىپ، مەملەكەتتىك ورگاندارمەن كەلىسىم دە جاسالعان. ۇكىمەتتىك ەمەس ۇيىم وكىلدەرى، ەكولوگتار مەن مۇناي كومپانياسىنىڭ قىزمەتكەرلەرى بۇل ماسەلەنى ونلاين جيىندا تالقىلادى.
نۇراش اجىعاليەۆ، كومپانيانىڭ ەڭبەك، قورشاعان ورتانى قورعاۋ جانە قاۋىپسىزدىك جونىندەگى ديرەكتورى:
- تابيعات قورعاۋشىلاردىڭ باستى كۇمانى بەنتوس پەن پلانكتون ازايىپ، بالىققا زيان كەلەدى دەگەن سۇراققا عالىمداردىڭ كومەگىمەن جاۋابى بەرىلدى. ن ك و ك كومپانياسى ەڭ ۇزدىك تەحنولوگيالاردى قولدانا وتىرىپ، جوبادان قورشاعان ورتاعا كەلەتىن اسەرلەردى تومەندەتۋگە كۇش- جىگەرىن ايامايدى. قازۋ جۇمىستارى بەكىتىلگەن جوسپارلارعا ساي جۇرگىزىلەدى.
مۇناي ءوندىرۋشى كومپانيا تەرەڭدەتۋ جۇمىستارىن قولعا الماسا، 2022 -جىلعى كەن ورنىنداعى كۇردەلى جوندەۋ جۇمىستارى جۇرگىزىلمەيدى. سالدارىنان 2027 -جىلى مۇناي ءوندىرىسى توقتاۋى مۇمكىن دەپ بولجام جاساپ وتىر. تەڭىز ءتۇبىن تەرەڭدەتۋ ارقىلى سالىناتىن ەكى كانالدىڭ ەنى 80 مەتردەن 115 مەترگە دەيىن بولادى. تەرەڭدەتۋ كەزىندە 19 ميلليونعا جۋىق تەكشە مەتر توپىراق شىعارىلادى ەكەن. بۇل جۇمىستار بيىل باستالىپ، 2022 -جىلدىڭ سوڭىنا دەيىن جوسپارلانىپتى.
www.24.kz