قازاقستاندا كورەي فيلمدەرىنىڭ فەستيۆالى وتەدى
ءىس-شارانى كورەيا رەسپۋبليكاسى ەلشىلىگىنىڭ كورەي مادەني ورتالىعى ۇيىمداستىرادى، دەپ حابارلايدى قازاقپارات.
بەس كۇنگە جالعاساتىن اتالعان ءىس-شارا اياسىندا كورەي مادەني ورتالىعىنىڭ رەسمي سايتىندا تانىمال كورەي رەجيسسەرى پون دجۋنحونىڭ «پارازيتتەر» فيلمى كورسەتىلەدى.
ايتا كەتەيىك، «پارازيتتەر» تريللەر ەلەمەنتتەرى بار كومەديالىق-درامالىق فيلمى وسكاردىڭ 6 نوميناتسياسىنا ىلىنگەن ەدى.
ناتيجەسىندە، 2020-جىلى شىعارماشىلىق توپ «ۇزدىك فيلم»، «ۇزدىك رەجيسسەرلىك جۇمىس»، «ۇزدىك ءتۇپنۇسقا سەناري»، «شەت تىلىندەگى ۇزدىك فيلم» نوميناتسيالارىندا 4 مۇسىنشەنى يەلەندى.
فەستيۆالدىڭ ماقساتى - قازاقستان حالقىن كورەي كينەماتوگرافى سالاسىمەن جاقىن تانىستىرۋ.
«ءبىز پاندەمياعا قاتىستى احۋال بارىنشا جىلدام جاقسارعانىن تىلەيمىز. بيىل ماڭىزدى داتا، ياعني قازاقستان تاۋەلسىزدىگىنىڭ 30 جىلدىعى اياسىندا ءتۇرلى ءىس-شارالار ەسكەرىلگەن. جالپى، قازاقستان مەن كورەيا رەسپۋبليكاسى اراسىنداعى مادەنيەت سالاسىنداعى بايلانىستار ءتۇرلى ءىس-شارالار ارقاسىندا جاندانادى دەپ سەنەمىز. بۇل تۇرعىدا ەكى ەل حالقىنىڭ تەرەڭ ءوزارا تۇسىنىستىگىنە ىقپال ەتەتىن بولادى»، - دەدى كورەي مادەني ورتالىعىنىڭ ديرەكتورى لي حەران.