قالالىق اكىمدىك بۇل جاعدايعا قاتىستى تۇسىنىكتەمە بەردى، دەپ حابارلايدى قازاقپارات ءتىلشىسى. الماتىلىق الەنا پلۋجنيكوۆا Facebook الەۋمەتتىك جەلىسىندەگى «دەجۋرنىي پو گورودۋ» توبىندا ويىنحانا جارناماسىنا قاتىستى جازبا جاريالادى.
«بىلتىر ماقاتايەۆ كوشەسىندەگى تۇرعىن ۇيگە ىلىنگەن جارناما باننەرى الىپ تاستالدى. ءبىراق بيىل قايتادان ورنىنا ءىلىپ قويىپتى. مۇنداي جارنامانى تۇرعىن ۇيلەر قاسبەتىنە ىلۋگە بول ما، بۇل زاڭدى ما؟»، - دەپ جازدى ول.
الماتى قالالىق جوسپارلاۋ جانە ۋربانيستيكا باسقارماسى مەدەۋ اۋدانى اكىمى اپپاراتىنا تىركەلمەگەن باننەردى جويۋ تۋرالى حات جولداعاندارىن اتاپ ءوتتى.
«اباتتاندىرۋ ەرەجەلەرىنە سايكەس بارلىق نىساننان (عيماراتتار مەن قۇرىلىستار قاسبەتى، دۇكەندەر جانە ت. ب. ) رۇقساتسىز ورنالاستىرىلعان اقپاراتتىق حابارلامالاردى، جازۋلار مەن بەينەلەردى جويۋ، سونداي- اق زاڭنامانى بۇزا وتىرىپ ورناتىلعان اقپاراتتىق باننەرلەردى جويۋ جۇمىستارى الماتى اۋداندارى اكىمى اپپاراتىنا، نىساننىڭ مەنشىك يەلەرىنە نەمەسە جالعا الۋشى تۇلعاعا جۇكتەلەدى»، - دەپ حابارلادى باسقارمادان.