نۇر- سۇلتاندا تاعى ءبىر ساۋدا ويىن- ساۋىق ورتالىعىندا ۆاكسيناتسيا پۋنكتى اشىلدى
قالادا بارلىعى 55 مىڭنان اسا ادام ۆاكتسينا الدى، دەپ حابارلايدى نۇر- سۇلتان اكىمدىگىنىڭ رەسمي سايتى .
«حان شاتىر» ساۋدا، ويىن- ساۋىق ورتالىعىندا قالا تۇرعىندارىنا كوروناۆيرۋسقا قارسى ۆاكسينا سالۋ پۋنكتى اشىلدى. وسى دەمالىس كۇندەرى تەستىلىك رەجيمدە س و و ۇجىمى ۆاكسينا الادى. ال دۇيسەنبىدەن باستاپ (19 -ءساۋىر) ازاماتتار دا ەكپە الا الادى. ۆاكسيناتسيا پۋنكتى گيپەرماركەتتىڭ جانىنداعى ءبىرىنشى قاباتتا ورنالاسقان. س و و- دا ۆاكسيناتسيالاۋعا نيەت بىلدىرۋشىلەردى قابىلداۋ كەستەسى ساعات 10:00-دەن 22:00-گە دەيىن.
بۇعان دەيىن ۆاكسيناتسيا پۋنكتى «Mega Silk Way» س و و- دا ىسكە قوسىلدى. سونداي- اق «Keruen» ، «ابۋ- دابي پلازا» ساۋدا، ويىن- ساۋىق ورتالىقتارى دايىن. قاجەت بولعان جاعدايدا قالاداعى قوناقۇيلەر دە ىسكە قوسىلادى.
«بۇگىن ەمحانالارىمىزدا بولىپ، ەگۋ پۋنكتتەرىنىڭ جۇمىسىن ساپالى ۇيىمداستىرۋ جونىندە ءبىرقاتار تاپسىرمالار بەردىم. العاشقى مەديتسينالىق- سانيتارلىق كومەك ۇيىمدارىندا ۆاكسينالاۋ پۋنكتتەرىنىڭ سانى 36-دان 100-گە دەيىن ارتتى. جۇمىس ۋاقىتى ساعات 8:00-دەن 24:00-گە دەيىن ۇزارتىلدى. سونىمەن قاتار ەڭبەك ۇجىمدارىن ۆاكسينامەن قامتۋ ءۇشىن كوشپەلى مەديتسينالىق بريگادالار قۇرىلدى. قالادا بارلىعى 55 مىڭنان استام ادام ۆاكسينا الدى. جاپپاي ۆاكسيناتسيالاۋ ارقىلى عانا ۇجىمدىق يممۋنيتەتتى قالىپتاستىرا الامىز. بۇل ءوزىڭىزدى جانە اينالاڭىزداعى ادامداردى قورعاۋعا، قالىپتى ومىرگە ورالۋعا مۇمكىندىك بەرەدى»، - دەپ جازدى ەلوردا اكىمى.