كوروناۆيرۋس: قىتايدا ءبىر ميللياردتان استام ادامعا ەكپە سالۋ قاجەت
مۇنداي پىكىرىن قىتاي ەلىنىڭ اۋرۋلاردى قاداعالاۋ جانە الدىن الۋ ورتالىعىنىڭ باس يممۋنولوگى ۆان حۋاشين ءبىلدىردى، دەپ حابارلايدى قازاقپارات.
«ۆاكسينالاۋ دەڭگەيى نەعۇرلىم جوعارى بولسا، يممۋندىق بارەر سوعۇرلىم كۇشتىرەك بولادى»، - دەدى ۆان حۋاشين. قىتايلىق يممۋنولوگ ەل تۇرعىندارىن ينفەكسيانىڭ تارالۋ جولىندا قورعانىس بارەرىن قالىپتاستىرۋ ءۇشىن تەزىرەك ۆاكسينا سالدىرتۋعا ۇندەدى. بۇل رەتتە ول ۆاكسينانىڭ قالىپتى، كوۆيدكە دەيىن بولعان ومىرگە تەزىرەك قايتىپ ورالۋ ءۇشىن ماڭىزدى ەكەنىن اتاپ ءوتتى.
ونىڭ ايتۋىنشا، COVID-19 ۆيرۋسىنىڭ جىلدام تارالۋى ونىڭ مۋتاتسيالانۋىنا مۇمكىندىك بەرەدى. ۆيرۋستىڭ جىلدام مۋتاتسياسىن توقتاتۋدىڭ ەڭ جاقسى ءادىسى - ينفەكسيانىڭ كوزىن جويۋ بولىپ تابىلادى، بۇل ادامداردى تەزىرەك ۆاكسينالاۋ جانە ولاردا كوروناۆيرۋسقا قارسى يممۋنيتەتىن قالىپتاستىرۋدى بىلدىرەدى. ۆاكسينالاۋدان كەيىن كوروناۆيرۋستى جۇقتىرۋ مۇمكىندىگىنە قاتىستى قاۋىپتەنۋگە قاتىستى تۇسىنىكتەمەسىن بەرگەن قىتايلىق ساراپشى 3-شى فازانىڭ كلينيكالىق سىناقتارى ەكپە سالدىرتقان ادامداردىڭ كوبىندە يممۋندىق قورعانىس پايدا بولاتىنىن اتاپ ءوتتى.
بۇعان دەيىن ق ح ر جەتەكشى ەپيدەميولوگى جۋڭ نانشان قىتاي بيلىگىنىڭ 2021 -جىلدىڭ ماۋسىمىنا قاراي COVID-19 ۆيرۋسىنا قارسى ۆاكسينانى ەل تۇرعىندارىنىڭ 40 قا جۋىق پايىزىنا، نەمەسە 560 مىڭعا جۋىق ادامعا (ق ح ر حالىق سانى - شامامەن 1,4 ميلليارد ادام) ەگۋگە نيەتتى ەكەنىن مالىمدەدى.
قىتايدا تۇرعىنداردىڭ باسىم توپتارىن ۆاكسينالاۋ وتكەن جىلدىڭ جەلتوقسانىندا باستالعان. سوڭعى مالىمەتتەرگە سايكەس، بۇكىل ەل بويىنشا كوروناۆيرۋسقا قارسى ۆاكسينانىڭ 164 ميلليون دوزاسى ەگىلگەن.