سونىمەن قاتار فرانسيادا كارانتين جاعدايىندا ەليتانىڭ جاسىرىن وتىرىستارى تەرگەلۋدە، دەپ حابارلايدى قازاقپارات BBC- گە سىلتەمە جاساپ.
ۇلىبريتانيا پرەمەر- ءمينيسترى بوريس دجونسون 12 -ساۋىردەن باستاپ انگليادا بارلىق دۇكەننىڭ اشىلاتىنىن راستادى. مەيرامحانالار، كافەلەر مەن پابتار دالادا قىزمەت ەتسە عانا اشىلادى. بۇل شارالار تەك انگلياعا قاتىستى. شوتلانديا، ۋەلس جانە سولتۇستىك يرلانديادا كارانتين شارالارىن ءوز ۇكىمەتتەرى باسقارادى؛ ولاردىڭ بارلىعى بىرتىندەپ شەكتەۋلەردى الىپ تاستاسا دا، ناقتى شارالاردى توقتاتۋ كۇندەرى ءار ءتۇرلى. دۇيسەنبىدە ۇلى بريتانيادا ۆاكسينانىڭ ءبىر دوزاسىن 31,5 ميلليوننان استام ادام الدى، بەس ميلليوننان استام (ەرەسەك تۇرعىنداردىڭ دان استامى) ۆاكسينانىڭ ەكى دوزاسىن دا الدى.
ۇزاق لوكداۋنعا جانە تەز يممۋنداۋعا بايلانىستى ۇلى بريتانيادا جاڭا ينفەكتسيالار سانى كۇرت تومەندەدى: قاڭتار ايىندا كۇنىنە 60 مىڭنان ءساۋىر ايىندا كۇنىنە 3 مىڭعا دەيىن.
پاريجدە زاڭسىز وتىرىستار تەرگەلۋدە
فرانسۋز پوليسياسى جاسىرىن كامەرا تۇسىرگەن M6 تەلەارناسىنىڭ رەپورتاجىنان كەيىن ەليتا كەشتەرىنە قاتىستى تەرگەۋدى باستادى.
«ۋىلدىرىق، شامپان، ەڭ ۇزدىك اسپازدار، ال ماسكا كيۋ قاجەت ەمەس» دەگەن ايدارمەن بۇل ماتەريال تەلەارنانىڭ الەۋمەتتىك جەلىلەرىندە پايدا بولدى. فرانسيانىڭ ىشكى ىستەر ءمينيسترى جەرالد دارمانەن سەنبىدەن باستاپ بۇكىل ەلدە قولدانىلاتىن شەكتەۋ شارالارىن بۇزۋعا جول بەرمەيتىنىن ايتتى. مەكتەپتەر مەن كوپتەگەن دۇكەندەر جابىلدى، 19:00-دەن 6: 00-گە دەيىن كومەندانتتىق ساعات. سەيسەنبىدەن باستاپ ۇيدەن 10 ك م قاشىقتىقتا شىعۋ تەك كەي جاعدايدا عانا مۇمكىن.
ەۋروپادا تاعى نە بولىپ جاتىر
گەرمانيادا ينتەنسيۆتى تەراپيا پاتسيەنتتەرىنىڭ سانى 4 مىڭعا جەتتى. بۇل اقپان ايىنىڭ باسىنان بەرگى ەڭ جوعارى كورسەتكىش. ال يتاليادا پاسحا مەرەكەسىنە وراي ءۇش كۇندىك لوكداۋن اياقتالۋعا جاقىن. ەل تۇرعىندارىنا ايماقتار اراسىندا جۇرۋگە تىيىم سالىندى، ءبىراق ەكى قوناقتى مەرەكەلىك داستارحانعا ۇيگە شاقىرۋعا رۇقسات ەتىلدى. قازىر ەلدە كۇن سايىن 20 مىڭعا جۋىق جاڭا جاعداي ورىن الۋدا.
ەۋروپانىڭ كوپتەگەن ەلدەرىندە بيلىك شەكتەۋلەردى كۇشەيتسە، پورتۋگاليا مەن گرەكيادا كەرىسىنشە، دۇيسەنبىدەن باستاپ جەڭىلدەيدى. پورتۋگاليادا مۇراجايلار، سپورت زالدارى، كافە تەرراسسالارى جانە كەيبىر مەكتەپتەر اشىلادى. وندا كارانتين قاڭتاردان باستاپ جاڭا جاعدايلاردىڭ تولقىنىنا بايلانىستى ارەكەت ەتتى، ناۋرىز ايىندا مەكتەپتەرگە كىشى سىنىپتارعا ورالۋعا رۇقسات ەتىلدى. دۇيسەنبىدە گرەكيادا جاڭا جاعدايلاردىڭ وسۋىنە بايلانىستى جاعداي الاڭداۋشىلىق تۋدىرعانىنا قاراماستان، كەيبىر دۇكەندەردى اشۋعا رۇقسات ەتىلدى. ساتىپ الۋشىلار سانى رۇقسات ەتىلگەننەن اسپاۋى ءۇشىن كەلەتىن ۋاقىتىن برونداۋى كەرەك.