بۇل تۋرالى بۇكىلالەمدىك اۋتيزم ماسەلەسى تۋرالى اقپارات تاراتۋ كۇنىنە ارنالعان بريفينگىدە ق ر دەنساۋلىق ساقتاۋ مينيسترلىگىنىڭ انا مەن بالانىڭ دەنساۋلىعىن قورعاۋ دەپارتامەنتى ديرەكتورىنىڭ ورىنباسارى ولجاس ىسقاقوۆ ءمالىم ەتتى، دەپ حابارلايدى قازاقپارات ءتىلشىسى.
«جىل سايىن 2-ساۋىردە بۇكىلالەمدىك اۋتيزم ماسەلەسى تۋرالى اقپارات تاراتۋ كۇنى اتالىپ وتەدى. بۇۇ باس اسسامبلەياسىنىڭ 2007 -جىلعى جەلتوقساننىڭ 18 ىندەگى ارنايى قارارىمەن بەكىتىلگەن. بۇل قۇجاتتا اۋتيزمنەن زارداپ شەگەتىن بالالار سانىنىڭ كوبەيىپ بارا جاتقانىنا الاڭداۋشىلىق بىلدىرىلگەن. وسى ماسەلەنىڭ وزەكتىلىگىنە بايلانىستى دەنساۋلىق ساقتاۋ، ءبىلىم جانە الەۋمەتتىك قورعاۋ ۇيىمدارىنىڭ بەلسەندى ءوزارا ءىس- قيمىلىنىڭ قاجەتتىگى ماڭىزدى بولىپ تۇر»، - دەدى و. ىسقاقوۆ ورتالىق كوممۋنيكاتسيالار قىزمەتىندە.
ونىڭ ايتۋىنشا، اتالعان ماسەلەدەگى قاجەتتى قادامدار ءتيىستى جول كارتاسىندا قاراستىرىلعان. دەنساۋلىق ساقتاۋ مينيسترلىگى جەتكىنشەكتەرگە كومەك كورسەتۋ قولجەتىمدىگىن قامتاماسىز ەتۋدە اتقارعان جۇمىستارىنا توقتالعان و. ىسقاقوۆ قازىرگى كەزدە قالالىق، وبلىستىق دەڭگەيدەگى پسيحيكالىق دەنساۋلىقتىڭ 17 ورتالىعى قىزمەت ەتىپ جاتقانىن ايتتى.
«2018 -جىلدان 2020 -جىل ارالىعىندا كومەكتىڭ قولجەتىمدىلىگىن جاقسارتۋ ءۇشىن قالالىق امبۋلاتوريالىق- ەمحانالىق ۇيىمداردا 74 باستاپقى پسيحيكالىق دەنساۋلىق ورتالىعى اشىلدى. اۋىلداردا 219 پسيحيكالىق دەنساۋلىق كابينەتى بار»، - دەدى ۆەدومستۆو وكىلى.
ونىڭ سوزىنە قاراعاندا، دەنساۋلىق ساقتاۋ ۇيىمدارىندا بالالار پسيحياترلارىنىڭ سانى ارتىپ كەلەدى. مينيسترلىك سوڭعى ەكى جىلدا پسيحياتريا باعىتى بويىنشا بيۋدجەتتىك گرانتتار سانىن كوبەيتتى. 2021 -جىلى پسيحياتريا، بالالار پسيحياترياسى ماماندىعى بويىنشا 150 استام رەزيدەنت وقۋدى ءتامامدايدى.
ايتا كەتەيىك، ءساۋىردىڭ 2 سى بۇكىلالەمدىك اۋتيزم ماسەلەسى تۋرالى اقپارات تاراتۋ كۇنى رەتىندە بەلگىلەنگەن. ب ۇ ۇ باس اسسامبلەياسىنىڭ 2007 -جىلعى جەلتوقساننىڭ 18 ىندەگى ارنايى قارارىمەن بەكىتىلگەن.
2008 -جىلدان باستاپ جىل سايىن ءساۋىردىڭ 2 سىندە اتاپ وتىلەدى. بۇل بۇكىلالەمدىك كۇن كاتار مەملەكەتىنىڭ ۇسىنىسى بويىنشا بەلگىلەندى، مۇنى بىرىككەن ۇلتتار ۇيىمىنىڭ باس حاتشىسى 2008 -جىلعى جولداۋىندا اتاپ ءوتتى. باس اسسامبلەيانىڭ قارارىندا، ەڭ الدىمەن، بالالاردىڭ اۋتيزم ماسەلەسىنە كوڭىل ءبولىندى، سونداي-اق دياگنوزدى نەعۇرلىم ەرتە قويۋ جانە ءتيىستى تەكسەرۋ جۇرگىزۋ اتاپ كورسەتىلگەن.
اۆتور: رۋسلان عابباسوۆ