باقىتجان ساعىنتايەۆ: الماتىدا ەپيدەميولوگيالىق جاعداي كۇردەلى

ەپيدەميا باستالعالى بەرى الماتىدا ينفەكسيانىڭ 35193 جاعدايى تىركەلگەن، ونىڭ 24012 دە اۋرۋ بەلگىلەرى بار.

«قالاداعى ەپيدەميولوگيالىق جاعدايعا كەلەر بولساق، جاعداي كۇردەلى. كۇندەلىكتى ءوسىم بايقالادى. وتكەن تاۋلىكتە 595 ادامنان كوروناۆيرۋس انىقتالدى. ونىڭ 497 سيمپتومدى، 98 سيمپتومسىز. الماتىدان جاڭا شتامدار شىقتى. بۇل اۋرۋ سانىنىڭ وسىمىنە اكەلىپ وتىر»، - دەدى اكىم. ونىڭ ايتۋىنشا، اۋرۋحانالاردا 2945 ادام ەم قابىلداپ جاتىر.

«قالادا ۆيرۋس جۇقتىرعانداردى قابىلدايتىن 7011 توسەك- ورىن ازىرلەنگەن. ولار 1, 2 جانە 3-ەشەلونعا بولىنگەن. ءبىرىنشى جانە ەكىنشى ەشەلون بويىنشا اۋىر جاعدايداعى ناۋقاستاردى قابىلدايمىز. قازىر 7 مىڭ توسەك- ورىننىڭ 5 430 توسەك- ورنى ىسكە قوسىلعان جانە ونىڭ 51 پايىزى تولدى»، - دەدى ساعىنتايەۆ.

اۋرۋدىڭ اۋىرلىق دارەجەسىنە نازار سالار بولساق، جاعدايى اسا اۋىر ناۋقاستار سانى - 52، وسىنداي ناۋقاستار سانى ارتىپ كەلەدى. 2362 ناۋقاستىڭ جاعدايى ورتاشا اۋىر. 1-ساۋىردە 233 ناۋقاس شىعارىلدى.

اۆتور: الما مۇقانوۆا