جەمقورلىق داۋى: قانات يسلامنان جاۋاپ الىندى
سول كەزدە كانادالىق برەندون كۋكتى جەڭىپ، WBA Inter- Continental مەن WBO NABO تيتۋلدارىن قورعاپ قالعان ەدى.
بوكس كەشىندە رينگكە باسقا دا قازاقستاندىقتار شىققان - جانقوش تۇراروۆ، جانىبەك ءالىمحان ۇلى، مەيىرىم نۇرسۇلتانوۆ، رۋسلان مىرساتايەۆ، ءالي احمەدوۆ، ايدوس ەربوسىن ۇلى مەن نۇرسۇلتان جاڭابايەۆ.
اراعا بىرنەشە جىل سالىپ ق ر سىبايلاس جەمقورلىققا قارسى قىزمەت وسى بوكسشىلاردان جاۋاپ العان. بۇل تۋرالى Vesti.kz جازدى.
باسىلىم مالىمەتىنشە، بۇل جەردە اڭگىمە EXPO-2017 بۇكىل الەمدىك كورمەسىندە بوكس كەشىن ۇيىمداستىرۋعا بولىنگەن قاراجاتتى جىمقىرۋ مەن ىسىراپ ەتۋ بولىپ وتىر.
Vesti.kz اقپاراتىنا سۇيەنسەك، بۇل بوكس كەشىن قانات يسلام قۇرعان Qazaq promotions پروموۋتەرلىك كومپانياسى ۇيىمداستىرعان. «سامۇرىق-قازىناعا» قاتىسى بار «تۋريزم يندۋسترياسى مەن سپورتتى قولداۋ قورى» نەگىزگى دەمەۋشىلەردىڭ ءبىرى بولىپتى.
سىبايلاس جەمقورلىققا قارسى قىزمەت تەكسەرىس بارىسىندا بارلىق بوكسشىنى كۋاگەر رەتىندە جاۋاپ الۋعا شاقىرىپ، سول كەشتە العان سىياقىسىن سۇراعان.
باسىلىم قور قانات يسلامنىڭ كومپانياسىنا قانشا ميلليون تەڭگە بەرگەنىن انىقتادى. ونى Qazaq promotions كومپانياسىنىڭ بۇرىنعى ديرەكتورى قايرات جايلاۋبايەۆ ايتىپ بەرگەن، ول - سول كەشتى ۇيىمداستىرۋعا اتسالىسقانداردىڭ ءبىرى.
جايلاۋبايەۆتىڭ ايتۋىنشا، قوردان بولىنگەن اقشا تەك بوكسشىلاردىڭ ۇشۋى مەن جاتاتىن ورنىنا عانا جەتكەن. ول كەزدە ۇيىمداستىرۋشىلار قور ۋادە ەتكەن سومانىڭ ءبارىن ۋاقىتىندا الا الماعان، سوندىقتان ولارعا قازاقستاندىق كاسىپكەر كومەكتەسىپتى. وسىنشا ۋاقىتتان كەيىن قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى وسى سپورتتىق شاراعا قاتىستى تەكسەرۋدى باستادى.
«قانات يسلام ەكەۋىمىز 2017-جىلى Qazaq promotions كومپانياسىن قۇردىق. ءبىز ءوز كوماندامىزعا وتاندىق كاسىپقوي بوكستى دامىتۋ ءۇشىن ماڭىزدى ماقساتتار مەن مىندەتتەر قويدىق. EXPO-2017 بۇكىل الەمدىك كورمەسى اياسىندا بوكسشىلارىمىزدىڭ دەڭگەيىن كورسەتەتىن ۇلكەن حالىقارالىق بوكس شوۋىن ۇيىمداستىرۋدى ۇسىندىق.
ءبىز مەملەكەت قاراجاتى ەسەبىنەن بايۋدى نەمەسە قارجىلىق الاياقتىق جاساۋدى ويلاعان جوقپىز. بوكس كەشى جوعارى دەڭگەيدە ءوتتى جانە EXPO-2017 اياسىنداعى ماڭىزدى شارالاردىڭ ءبىرى بولدى. بارلىق جەكپە-جەك كەرەمەت ءوتتى، ارەنا تولى بولدى، ءبىز حالىققا سپورت مەرەكەسىن سىيلادىق.
سول كەزدە «تۋريزم يندۋسترياسى مەن سپورتتى قولداۋ قورى» تۋرنيردى ۇيىمداستىرۋعا كەتكەن بارلىق شىعىندى ءوز موينىنا الىپ، ءتىپتى بوكسشىنىڭ بارىنە سىياقى تولەۋگە ۋادە بەردى. باسىندا ولار 73 ميلليون تەڭگە ءبولدى، مەن بۇل اقشانىڭ ءبارىن بوكسشىلاردىڭ كەرەگىنە جۇمسادىم. بۇل شىعىندارعا بارلىق بوكسشى مەن كوماندا مۇشەلەرىنىڭ جولى، جاتاتىن ورنى، تاماعى كىردى. 30 دان اسا ادامعا وسىنداي جاعداي جاسادىق.
بارلىق بيلەت ساتىلىپ، جارناما ناۋقانى قىزىپ تۇرعان كەزدە، جەكپە-جەككە ەكى كۇن قالعاندا قور بىزگە 73 ميلليون تەڭگەدەن ارتىق ەشتەڭە بەرە المايتىنىن ايتتى. بىلايشا ايتقاندا، ولار ۋادە بەردى دە، ورىندامادى.
قالعان اقشانى بىزگە كاسىپكەر باۋىرجان وسپانوۆ بەرىپ، تۋرنيردى قۇتقارىپ قالدى. ول بوكسشىلار مەن باسقالارعا قانشا اقشا بەرگەنىن بىلمەيمىن، ءبىراق قالعان بارلىق شىعىندى ءوز قالتاسىنان شىعاردى. قانات يسلام بۇل جەكپە-جەك ءۇشىن كوك تيىن دا الماعانىن بىلەمىن.
2017-جىلى قورعا رەسمي حات جازدىق. وسى حاتتىڭ نەگىزىندە، ءبىر جىلدان كەيىن، 2018-جىلدىڭ كۇزىندە، قور بىزگە ۋادە ەتىلگەن كومەكتىڭ قالعان بولىگى رەتىندە كەيبىر زاتتى سىيعا تارتتى.
وسى دەرەكتەردەن كەيىن سىبايلاس جەمقورلىققا قارسى قىزمەت قوردى تەكسەرە باستادى، مەنىمەن بىرگە بارلىق بوكسشىنى كۋاگەر رەتىندە شاقىردى. وسى جۇيە كۇدىك تۋدىرعان. ءبىز سۇرادىق، ولار بەردى، ەشتەڭە ۇرلامادىق. وسى پروتسەستىڭ قۇجاتتاماسىندا قاتە كەتكەن بولىپ شىقتى، قازىر تەكسەرۋ جۇمىستارى ءجۇرىپ جاتىر»، - دەدى جايلاۋبايەۆ.
قىزىق دەرەك. ا ق ش- تا وتكەن كەيىنگى جەكپە-جەگىندە قانات يسلام (28-0، 22 ك و) رينگكە جاڭا Turan promotions پروموۋتەرلىك كومپانياسىنىڭ اتاۋى جازىلعان جەيدەمەن شىعىپ، كومپانياسىن رەسمي تۇردە تانىستىرعان. Qazaq promotions اتاۋىن وزگەرتكەنى نەمەسە ۇيىم رەتىندە جابىلعانى بەلگىلى بولدى.
بەيرەسمي اقپارات كوزدەرىنە سۇيەنسەك، EXPO-2017 اياسىندا جۇدىرىقتاسقان بارلىق بوكسشى بىلتىر كۋالىك بەرگەن. 2020-جىلدىڭ 2- قازانىندا اگەنتتىكتىڭ باسپا ءسوز قىزمەتى باس ديرەكتورعا قارسى «تۋريزم يندۋسترياسى مەن سپورتتى قولداۋ قورى» كورپوراتيۆتىك قورىنان اسا ءىرى كولەمدە قاراجات جىمقىرۋ دەرەگى بويىنشا ءىس قوزعالىپ، ول سوتقا جىبەرىلگەنىن حابارلاعان.
Qazaq promotions كومپانياسى مەن قوردىڭ بۇل ىستە باسقا دا بايلانىسى بار-جوعى، بيۋجەتتەن قانشا اقشا ۇرلانعانى بەلگىسىز.