بۇل تۋرالى بيولوگيالىق قاۋىپسىزدىك ماسەلەلەرىن عىلىمي-زەرتتەۋ ينستيتۋتىنىڭ زەرتحانا مەڭگەرۋشىسى، PhD دوكتورى ەربول بوراشيەۆ مالىمدەدى، دەپ حابارلايدى قازاقپارات ءتىلشىسى.
«وسىدان ون كۇن بۇرىن COVID-19-دىڭ وڭ ۇلگىلەرىن العانىمىز راس. زەرتتەۋلەر ناتيجەسىندە بريتاندىق تيپتەگى كوروناۆيرۋستىق ينفەكتسيانىڭ جاڭا نۇسقاسىنا جاتاتىن شتامم تابىلدى. قازىرگى ۋاقىتتا ونىڭ ۆيرۋسىن ءبولۋ بويىنشا تەرەڭ زەرتتەۋلەر جۇرگىزىلۋدە. انىقتالعان كوروناۆيرۋس شتامى ەۋروپادا، ا ق ش- تا تاراعان بريتاندىق شتامعا سايكەس كەلەدى. باسقاشا ايتقاندا، جاڭا الماتىلىق شتامم دەگەن جوق. ياعني ءبىز زەرتتەپ جاتقان شتامم - جەلتوقسان ايىنىڭ اياعىنان بەرى الەمدە كەڭىنەن تارالىپ جاتقان شتامم. بىزدە ول ەندى عانا تىركەلىپ جاتىر»، - دەپ ءتۇسىندىردى ەربول بوراشيەۆ اگەنتتىك تىلشىسىنە تەلەفون ارقىلى بەرگەن مالىمەتىندە.
ول، سونداي-اق، انىقتالعان كوروناۆيرۋس شتامىنىڭ ەرەكشەلىكتەرى تۋرالى ايتتى.
«باسقا شتامداردان ايىرماشىلىعى، ول وتە جۇقپالى جانە تيگىزەتىن زالالى اۋىر. سوندىقتان ول بۇكىل الەمگە تەز تاراپ جاتىر. ياعني، بۇرىنعى شتامداردان دا جۇقپالى، ونىڭ ۇستىنە اعزاعا تيگىزەر اسەرى ءالى تولىق زەرتتەلمەگەن»، - دەيدى ەربول بوراشيەۆ.
ساراپشى پاندەميانىڭ بەتى قايتپاي تۇرعانىن، اۋرۋدىڭ قوزدىرعىشتارى مەن گەنەتيكالىق قاسيەتتەرى وزگەرۋگە وتە بەيىم ەكەنىن ايتادى. شەتەلدىك عالىمداردىڭ زەرتتەۋلەرىنە سايكەس، SARS- CoV-2 ۆيرۋسى كوپتەگەن تابيعي جولداردان ءوتىپ، گەنومى گەنەتيكالىق وزگەرىستەرگە ۇشىراعان.
COVID-19 قوزدىرعىشىنىڭ «بريتاندىق» جانە «وڭتۇستىكافريكالىق» شتامدارى وسىلاي پايدا بولعان. حالىقارالىق GISAID دەرەكتەر بازاسىنىڭ مالىمەتى بويىنشا، اتالمىش كلايد G مۋتاتسياسى جەر بەتىنىڭ بارلىق نۇكتەسىنە جەتكەن.