اۋىل بەلسەندىلەرى فەرما جۇمىسىنىڭ قورشاعان ورتاعا تيگىزىپ جاتقان زيانى، ەكولوگيالىق تالاپتاردىڭ بۇزىلۋى تۋرالى باياندادى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.
مينيستر مىرزاعاليەۆ پەن اقتوبە وبلىسىنىڭ اكىمى وڭداسىن ورازالين شارۋاشىلىق مەكەمەسىنە قاتىستى تەكسەرۋ قورىتىندىلارىن جەدەلدەتىپ، ماسەلەنىڭ زاڭ اياسىندا ورىندى شەشىلۋىنە بىرلەسە ىقپال جاسايتىندارىن جەتكىزدى.
«ءبىز جاعدايدان حاباردارمىز، تۇسىرگەن بارلىق ۆيدەولارىڭىزدى كوردىك. وڭىرلەردە نە بولىپ جاتقانىن بىلەمىز. ماسەلەنى زاڭدى تۇردە اياعىنا دەيىن جەتكىزۋ كەرەك. ءبىز تەكسەرۋ پروتسەستەرىن جەدەلدەتۋگە اتسالىسامىز»، - دەدى مينيستر.
جەرگىلىكتى حالىق ماسەلەنىڭ شەشىلۋىنە ءوز تاراپتارىنان بارىنشا كومەك كورسەتۋگە دايىن ەكەندەرىن ايتتى.
«جەرلەستەرىمىزدىڭ تالاپ- تىلەكتەرى ورىندى. وسى ماسەلە كوتەرىلگەن كۇننەن باستاپ، اۋىل تۇرعىندارى سابىرلىق تانىتىپ، تۇسىنىستىكپەن قاراپ كەلەدى. شوشقا فەرماسى باعىتىن وزگەرتۋى كەرەك نەمەسە جۇمىسىن توقتاتۋى قاجەت. دەگەنمەن، بۇل ءبىر كۇننىڭ شارۋاسى ەمەس، قازىر قۇزىرلى مەكەمەلەر تاراپىنان قاجەتتى شارالار قابىلدانىپ، جۇمىس ءجۇرىپ جاتىر»، - دەپ ايتتى ءوڭىر باسشىسى وڭداسىن ورازالين.
ەسكە سالساق، 2020 -جىلى قاراشا ايىندا بەستاماق اۋىلىنىڭ تۇرعىندارى شوشقا فەرماسىن جابۋدى تالاپ ەتكەن بولاتىن. جوسپاردان تىس تەكسەرۋ ناتيجەسىندە لاس زاتتار شىعارىندىلارىنىڭ شامادان تىس كولەمى مەن قالدىقتارى كومۋ، وندىرىستىك سۋدى رۇقساتسىز توگۋ فاكتىلەرى ءۇشىن فەرماعا 7 ميلليارد تەڭگەگە جۋىق ايىپپۇل سالىندى. قازىرگى ۋاقىتتا سوت پروتسەستەرى جالعاسىپ جاتىر.