زارداپ شەككەن ادامعا ۇلتتىق ۇلاننىڭ اسكەري قىزمەتشىلەرى كومەكتەستى، دەپ حابارلايدى قازاقپارات ۇلتتىق ۇلاننىڭ باسپا ءسوز قىزمەتىنە سىلتەمە جاساپ.
ەلوردانىڭ الماتى اۋدانىندا قوعامدىق ءتارتىپ پەن قاۋىپسىزدىكتى قامتاماسىز ەتىپ جۇرگەن ۇلتتىق ۇلاننىڭ №5573 اسكەري ءبولىمىنىڭ جاساعى كوشەدە كەلە جاتىپ، تايعاناپ قۇلاعان ەر ادامعا نازار اۋداردى. ونىڭ قاسىنا دەرەۋ كەلىپ جەتكەن اسكەريلەر 50-55 جاس شاماسىنداعى ەر ادامنىڭ ەسىنەن تانعانىن بايقايدى. وقيعا ورنىنا جەدەل جاردەم شاقىرعان ولار زارداپ شەگۋشىگە العاشقى مەديتسينالىق كومەك كورسەتە باستاعان.
ولار اۋەلى ەر ادامنىڭ جاراقات العان باسىن تاڭىپ، ودان كەيىن زارداپ شەگۋشىنى مەديتسينا قىزمەتكەرلەرىنىڭ قولىنا تاپسىردى. قىزمەت كورسەتۋ بارىسىندا ازاماتقا جەدەل تۇردە كورسەتكەن كومەگى ءۇشىن اسكەري جاساق باستىعى مارعۇلان نۇرتايەۆ پەن پاترۋل قىزمەتكەرلەرى ارمان ورىنباسار جانە بەكجان ەرمەك اسكەري ءبولىم كومانديرى ىنتالاندىرۋ سىيلىعىن الدى.
اۆتور: زارينا تۋعانبايەۆا