الماتىدا كوروناۆيرۋستىڭ جاڭا شتامدارى تەز تارالىپ جاتىر - بەكشين

بۇل تۋرالى ونلاين بريفينگ بارىسىندا قالانىڭ باس مەملەكەتتىك سانيتار دارىگەرى جانداربەك بەكشين ءمالىم ەتتى، دەپ حابارلايدى قازاقپارات ءتىلشىسى.

جانداربەك بەكشيننىڭ ايتۋىنشا، ەپيدەميولوگيالىق باعالاۋ بويىنشا قالا «قىزىل» ايماقتا. ونىڭ ۇستىنە قالادا مۋتاتسيادان وتكەن شتامدار تارالىپ جاتىر.

«بۇل وزگەرىستەر وتكەن اپتادا تابىلدى. جالپى كوروناۆيرۋستىڭ برازيليالىق، بريتاندىق جانە وڭتۇستىك افريكا شتامدارىنىڭ بەلگىلەرى بار. زەرتتەۋ جۇرگىزۋ كەزىندە بريتاندىق جانە وڭتۇستىك افريكا شتامدارى تابىلدى. سوعان وراي قالادا شەكتەۋ شارالارى ەنگىزىلدى. شاھاردىڭ «قىزىل» ايماققا كىرگەنىنە ەكى اپتادان استى»، - دەيدى جانداربەك بەكشين.

سونىمەن قاتار ول، قازىر قالادا 3085 وشاق باقىلاۋعا الىنعانىن اتاپ ءوتتى.

«ونىڭ ىشىندە ءۇي وشاعىندا 4 مىڭداي ادام مەديتسينالىق باقىلاۋدا جانە 1233 قالا تۇرعىنى جۇمىس ىستەيتىن جەرى جانە وقۋ ورنى بويىنشا باقىلاۋعا الىنعان. بۇگىنگى كۇنى 2759 ادام ەم قابىلداپ جاتىر. وتكەن تاۋلىكتە 545 ادامنان ۆيرۋس انىقتالعان. ءبىزدىڭ بولجام بويىنشا جاڭا شتامداردىڭ ينكۋباتسيالىق مەرزىمى ەكى ەسە از، ال تارالۋى - ەكى ەسە جىلدام. ورتاشا دەڭگەيدەگى اۋرۋلاردىڭ سانى كوبەيدى»، - دەدى ول.

اۆتور: الما مۇقانوۆا