ب ق و باس مەملەكەتتىك سانيتار دارىگەرى مۇحامعالي ارىسپايەۆتىڭ 30-ناۋرىزداعى قاۋلىسى شىقتى. 1-ساۋىردەن باستاپ كۇشىنە ەنەتىن قاۋلىعا سايكەس ءتورتىنشى توقساندا وبلىس اۋداندارىندا كونتيگەنتى 300 وقۋشىعا دەيىنگى اۋىلدىق مەكتەپتەردە بالالار سانىن 25 تەن اسىرماي ءداستۇرلى تۇردە وقىتۋعا رۇقسات بەرىلەدى.
ال ىندەت كوبەيىپ وتىرعان ورال قالاسى، ءبورلى جانە بايتەرەك اۋداندارىندا بالا سانى 15 تەن اسپاۋى ءتيىس. ءبىلىم بەرۋ ۇيىمى اكىمشىلىگىنىڭ شەشىمى بويىنشا ساباقتان تىس ۋاقىتتا 15 ادامنان اسپايتىن توپتاردا شاكىرتتەردى جەكە وقىتۋعا بولادى. سونداي-اق جالپى ءبىلىم بەرەتىن مەكتەپتەردە مەكتەپالدى جانە 1-5-سىنىپتار، حالىقارالىق مەكتەپتەردە 1-7-سىنىپتاردا بالا سانىن 25-تەن اسىرماي ارالاس فورماتتا وقىتۋعا رۇقسات بەرىلدى.
ورال قالاسى، ءبورلى جانە بايتەرەك اۋداندارىندا بالا سانى 15 تەن اسپايدى. وقۋ بىتىرەتىن سىنىپتار (9-12-سىنىپتار) اپتانىڭ التى كۇنى ىشىندە بالا سانىن 15 تەن اسىرماي، پاندەردىڭ 70 پايىزىن شتاتتىق رەجيمدە، 30 پايىزىن قاشىقتان وقيدى. تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ ۇيىمدارىندا، جوعارى جانە ج و و- دان كەيىنگى وقۋ ورىندارىندا 1-كۋرس ستۋدەنتتەرى سانيتارلىق تالاپتاردى ساقتاي وتىرىپ، ارالاس تۇردە ءبىلىم الادى.
ءدىني ورىنداردا ءار كەلۋشىگە كەمىندە 5 شارشى مەتر ەسەبىندە، نىساننىڭ تولۋىن 30 پايىزدان اسىرماي جۇمىس ىستەۋگە رۇقسات ەتىلگەنىمەن، بۇقارالىق ۇجىمدىق ءىس-شارالاردى وتكىزۋگە تىيىم سالىندى. قاسيەتتى رامازان ايى كەزىندە دە ۇجىمدىق اۋىزاشار وتكىزۋگە بولمايدى. قوعامدىق تاماقتاندىرۋ ورىندارى سانيتارلىق تالاپتى ساقتاي وتىرىپ، ساعات 09.00-دەن 22.00-گە دەيىن جۇمىس ىستەيدى. ۇجىمدىق، سالتاناتتى، وتباسىلىق جانە باسقا بۇقارالىق ءىس- شارالار وتكىزىلمەيدى.
سونىمەن قاتار تاعامدى جەتكىزۋ جانە شىعارىپ بەرۋدى قوسپاعاندا، سەنبى جانە جەكسەنبى كۇندەرى قىزمەتىن توقتاتادى. فۋدكورت قىزمەتى دە تەك تاعامدى جەتكىزۋ جانە شىعارىپ بەرۋمەن اينالىسا الادى. ەسكە سالا كەتەيىك، بۇدان بۇرىن ب ق و- دا ينفەكسيالىق ستاتسيوناردا جاتقاندار سانى 355 كە جەتكەنىن جازعان بولاتىنبىز.
اۆتور: ەلجان ەرالى