قالا قارقىندى ءوسىپ جاتىر. قاي جاقتارعا باسىمدىق بەرىلگەن؟ جالپى، جاقىن بولاشاقتا باس شاھارىمىز قالاي تۇلەپ، تۇرلەنەدى؟
باس قالاداعى حالىقتىڭ سانى بۇگىندە 1 ميلليون 100 مىڭنان استى. قازىر شاھار اۋماعى ۇلعايىپ بارادى. اسىرەسە تۇرعىن ۇيلەردىڭ سانى وسكەن. ناتيجەسىندە جاڭا اۋداندار پايدا بولىپ جاتىر.
الىبەك ءابدىرايىموۆ، «استانانىڭ باس جوسپارى» ينستيتۋتىنىڭ مامانداندىرىلعان شەبەرحانا باسشىسى:
- قازىرگى تاڭدا ەلوردا مىڭجىلدىق اللەياسى، حانشاتىردىڭ ارتى، ەكسپو اۋدانى، تەلمان جانە قاراعاندىعا شىعا بەرىس جاققا قاراي كەڭەيتىلىپ جاتىر. بۇدان بولەك، ەسكى قالا جاق تا وسەدى. ياعني جاڭا تۇرعىن ۇيلەردىڭ دەنى وسى اتالعان اۋماقتاردا سالىنادى. سونىمەن قاتار اسان قايعى كوشەسىندەگى جەر ۇيلەر ءسۇرىلىپ، جاڭا ماگيسترال سالىنادى، ينجەنەرلىك جەلىلەر تارتىلادى. وسىلايشا ول جاق تا وسەدى.
ەندىگى ماقسات - وزگە ەلدەردىڭ استاناسى سياقتى ءبىزدىڭ دە باس شاھاردى «قاۋىپسىز ءھام اقىلدى قالا» ەتۋ. قازىر اۋلالارعا جاپپاي كامەرا قويىلۋدا. ناتيجە بار. تەك بىلتىردىڭ وزىندە ەلورداداعى قىلمىس 30 پروتسەنتكە ازايعان. ال نۇر- سۇلتاننىڭ جولدارى ەل بويىنشا ەڭ قاۋىپسىز دەپ تانىلعان.
بەكسۇلتان قۋاندىق، قالالىق سيفرلاندىرۋ جانە مەملەكەتتىك قىزمەتتەر باسقارماسى ءبولىمىنىڭ باس مامانى:
- سونداي- اق اعىمداعى جىلعى اقپان ايىندا «Birge» پلاتفورماسى، جالپى يدەيالارعا ارنالعان الاڭ ىسكە قوسىلدى، ول قالا تۇرعىندارىنا ەلوردانىڭ تىنىس- تىرشىلىگىنىڭ جەكەلەگەن ماسەلەلەرىن شەشۋ بويىنشا يدەيالار ۇسىنۋعا جانە بىلىكتى ساراپشىلار ىرىكتەپ العان ۇسىنىستارعا داۋىس بەرۋگە مۇمكىندىك بەرەدى. بارلىق يدەيالاردى ساراپشىلار قاراستىرادى، ال ەڭ جاقسىلارىن ىسكە اسىرۋعا كەپىلدىك بەرىلەدى. ياعني قالانى دامىتۋعا تۇرعىنداردىڭ ءوزى دە تىكەلەي اتسالىسا الادى دەگەن ءسوز بۇل.
قازىر شاھاردا سيفرلىق جۇيەگە باسىمدىق بەرىلگەن. ماسەلەن، اكىمدىك كورسەتەتىن مەملەكەتتىك قىزمەتتەر بىلتىر 100 پروتسەنتكە سيفرلاندىرىلدى. ايتالىق، ەندى پاتەر العان كەزدە قۇجاتتاردى ونلاين راسىمدەۋگە بولادى.
بەكسۇلتان قۋاندىق، قالالىق سيفرلاندىرۋ جانە مەملەكەتتىك قىزمەتتەر باسقارماسى ءبولىمىنىڭ باس مامانى:
- پاتەر ساتىپ العاننان كەيىن ازامات بارلىق مونوپوليستەردى ارالاپ، ارقايسىسىمەن جەكە كەلىسىمشارت جاساپ، قوڭىراۋ شالىپ، قۇجاتتاردىڭ دايىن ەكەنىن بىلۋگە ءماجبۇر بولاتىن - بۇل ءبىر ايعا سوزىلاتىن ەدى. ءۇي ساتىپ العان ادام گاز، جارىق، سۋدىڭ قۇجاتتارىنىڭ بارلىعىن ІQala دەگەن پورتالعا ءبىر قۇجات تاپسىرىپ الا الادى. ءوتىنىش بەرۋشى ءوتىنىشى مەن جەكە كۋالىگىن تاپسىرسا بولدى.
بەكىتىلگەن كەشەندى جوسپارعا سايكەس، 2030 -جىلعا دەيىن قالانىڭ وڭ جانە سول جاعالاۋلارىن قوساتىن جاڭا جولدار مەن كوپىرلەر سالىنادى. وسىلايشا قازىر حالقى 1 ميلليوننىڭ توڭىرەگەندە بولىپ تۇرعان ەلوردا بىرەر جىلدا 1,5 ميلليون تۇرعىنى بار قالاعا اينالماق.
www.24.kz