پرەزيدەنتتىڭ باسپا ءسوز حاتشىسى دميتري پەسكوۆ تاسس- قا ءمالىم ەتكەندەي، ۆ. پۋتيننىڭ جاعدايى جاقسى جانە 24 -ناۋرىز كۇنى ول جۇمىسقا شىعادى.
«پۋتين كورناۆيرۋسقا قارسى ەگىلدى. ءوزىن جاقسى سەزىنۋدە. ەرتەڭ تولىق جۇمىس كۇنى بولادى»، - دەدى كرەمل وكىلى.
دەگەنمەن، كرەملدە ۆلاديمير پۋتين رەسەيلىك ءۇش ۆاكسينانىڭ قايسىسىن سالدىرعانىن ناقتىلامادى. بۇعان دەيىن د. پەسكوۆ ەل پرەزيدەنتى سالدىراتىن ۆاكسينانىڭ اتاۋى ادەيى اتالماي وتىرعانىن ءمالىم ەتكەن ەدى. سەبەبى «رەسەيلىك بارلىق ءۇش ۆاكسينا دا بارىنشا سەنىمدى ءارى ءتيىمدى».
رەسەي پرەزيدەنتىن ەگۋ پروتسەدۋراسى وزگە ەلدەردەگى ساياساتكەرلەردە سياقتى كوپشىلىككە كورسەتىلگەن جوق. مۇنىڭ سەبەبىن جۋرناليستەرگە كرەمل وكىلى ءتۇسىندىردى: «كامەرا الدىندا ۆاكسينالاۋعا كەلسەك، وعان (پۋتينگە) بۇل ۇنامايدى»، - دەدى ول.
2020 -جىلدىڭ 17 - جەلتوقسانىندا ۆلاديمير پۋتين مۇمكىن بولعان ساتتە- اق كوۆيدكە قارسى ۆاكسينالاناتىنىن ايتقان ەدى. ول كەزدە مامانداردىڭ جاس بويىنشا شەكتەۋلەرگە قۇلاق اسىپ وتىرعانىن جەتكىزگەن بولاتىن. كەيىننەن پرەزيدەنتتىڭ باسپا ءسوز حاتشىسى پۋتينگە كوروناۆيرۋسقا قارسى ەگىلەتىن ۋاقىتتى بەلگىلەۋ ونىڭ ۋاقىتىلى الىپ وتىراتىن وزگە ۆاكسينالاردى سالدىرۋمەن بايلانىستى ەكەنىن ءتۇسىندىردى. ال بىرنەشە پرەپاراتتى ءبىر مەزگىلدە الۋعا بولمايدى.
اۆتور: ميرا تولەندى قىزى