وعان سايكەس، ۆلاديمير پۋتين جانە رەسەيدىڭ ءبىرقاتار ۇكىمەتتىك ۇيىمدارى دجو بايدەندى اشكەرەلەپ، سايلاۋ ۇردىسىنە قوعامنىڭ سەنىمىن كەتىرۋگە تىرىسقان كورىنەدى. 17- ناۋرىزدا دجو بايدەن «ەي- بي- سي» تەلەارناسىنا بەرگەن سۇحباتىندا «ۆلاديمير پۋتيندى «باسكەسەر» دەپ ەسەپتەيسىز بە؟» دەگەن سۇراققا «ءيا» دەپ ءتىل قاتتى. سونداي- اق ول امەريكاندىق سايلاۋعا ارالاسقانى ءۇشىن رەسەي باسشىلىعىن جازالايتىنىن ەسكەرتتى.
ۆلاديمير پۋتين دە ا ق ش پرەزيدەنىتىڭ بۇل سوزدەرىن جاۋاپسىز قالدىرعان جوق. رەسەي بيلىگىنىڭ نۇسقاۋىمەن بۇل ۇيىمدار بايدەن وتباسى ۋكراينادا جەمقورلىققا باتتى دەگەن مالىمەتتى تاراتىپ كەلدى. ال بۇعان ءوز قاتىسى بارىن جاسىرۋ ءۇشىن اقپاراتتى ۋكراينا ازاماتتارىنىڭ كومەگىمەن تاراتقان. باياندامادا كورسەتىلگەن وسى دەرەكتەر جاريالانعاننان كەيىن كوپ ۇزاماي ا ق ش پرەزيدەنتى رەسەيدىڭ بۇل ارەكەتى جاۋاپسىز قالمايتىنىن مالىمدەدى.
جەرگىلىكتى اقپارات قۇرالدارىنىڭ حابارلاۋىنشا، اق ءۇي اكىمشىلىگى كەلەسى اپتادا سايلاۋعا ارالاسقانى ءۇشىن رەسەيگە سانكسيالار سالماق.
دجەين پساكي، اق ءۇي اكىمشىلىگىنىڭ باسپا ءسوز حاتشىسى:
- بۇرىنعى اكىمشىلىكپەن سالىستىرعاندا رەسەيگە قاتىستى ءبىزدىڭ ۇستانىمىمىز وزگەرەدى. پرەزيدەنت سۇحباتىندا مۇنى ايقىن جەتكىزدى. ارامىزدا تۋىنداعان ماسەلەلەر بويىنشا ناقتى جاۋاپ سۇرايمىز. سونىمەن قاتار بىرلەسىپ جۇمىس ىستەي الاتىن سالالار دا بار. بۇعان ۇلگى رەتىندە ستراتەگيالىق شابۋىلداۋشى قارۋ- جاراق جونىندە جاساعان جاڭا كەلىسىمدى كەلتىرۋگە بولادى. ءبىراق قارىم- قاتىناسىمىز وزگەشە بولادى. ءبىزدى الاڭداتقان ساۋالدار جونىندە پرەزيدەنت ايتقانداي، رەسەي ءوز ارەكەتتەرى ءۇشىن جاۋاپكەرشىلىككە تارتىلادى.
رەسەي پرەزيدەنتىنىڭ باسپا ءسوز حاتشىسى دميتري پەسكوۆ «بۇل نەگىزسىز ايىپتاۋ» دەيدى.
دميتري پەسكوۆ، ر ف پرەزيدەنتىنىڭ باسپا ءسوز حاتشىسى:
- وسى باياندامانىڭ ەلىمىزگە قاتىستى جاساعان قورىتىندىسىمەن كەلىسپەيمىز. رەسەي 2016 جانە 2020 -جىلدارى ا ق ش- تا وتكەن سايلاۋعا ارالاسقان جوق. سوندىقتان بۇل باياندامانى تەرىس دەپ سانايمىز. ەشبىر نەگىزى جوق جانە ناقتى دالەل كەلتىرمەگەن.
17- ناۋرىزدا دجو بايدەننىڭ «ەي- بي- سي» تەلەارناسىنا بەرگەن سۇحباتى جارىق كوردى. ول «ۆلاديمير ءپۋتيندى كىسى ءولتىرۋشى» دەپ سانايسىز با دەگەن ساۋالعا «ءيا» دەپ جاۋاپ بەرگەن. بۇل سوزدەرىن الەمنىڭ بارلىق ءىرى اقپارات قۇرالدارى تاراتتى. وسىدان كەيىن رەسەي سىرتقى ىستەر مينيسترلىگى ا ق ش- تاعى ەلشىسى اناتوليي يۆانوۆتى شاقىرتىپ الدى. ۆلاديمير پۋتين دە بۇل سوزدەرىن جاۋاپسىز قالدىرعان جوق.
ۆلاديمير پۋتين، ر ف پرەزيدەنتى:
- نە دەپ جاۋاپ بەرەر ەدىم؟ ساۋ بولىڭىز دەر ەدىم. وعان دەنساۋلىق تىلەيمىن. بۇل ءازىل ەمەس. ەكىنشىدەن، وسى تاقىرىپتى كەڭىنەن تالقىلاساق، ءار حالىق پەن مەملەكەتتىڭ تاريحىندا تالاي اۋىر جانە قاندى وقيعالار بولعان. ءبىراق وزگە ادامداردى، ءتىپتى حالىقتار مەن مەملەكەتتەردى باعالاعاندا ايناعا قاراعانداي بولامىز. وندا ءوزىمىزدى كورەمىز. بىلەسىز بە، بالا كەزىمدى ەسكە الدىم. اۋلادا ءبىر- بىرىمىزبەن داۋلاسقاندا، «مازاقتاعان ادام ءوزى سونداي» دەيتىن ەدىك.
پۋتين بايدەندى تىكەلەي ەفيردەگى پىكىرتالاسقا شاقىردى سونداي- اق ۆلاديمير پۋتين دجو بايدەنگە تىكەلەي ەفيردە پىكىرتالاس وتكىزۋدى ۇسىندى. رەسەي باسشىسى ا ق ش پرەزيدەنتىمەن ەكى جاقتى قارىم- قاتىناستى، ستراتەگيالىق ماسەلەلەر مەن ادامزات ءۇشىن ماڭىزدى باسقا دا تۇيتكىلدەردى تالقىلاعىسى كەلەتىنىن ءبىلدىردى.
ۆلاديمير پۋتين، رف پرەزيدەنتى:
- ءدال قازىر نە ويلاعانىمدى ايتايىن: وتكەندە پرەزيدەنت بايدەن تەلەفونمەن سويلەسۋ باستاماسىن كوتەردى. ال مەن بايدەنگە پىكىرتالاستى جالعاستىرۋدى ۇسىنعىم كەلەدى، ءبىراق ەكىجاقتى اشىق اڭگىمەنى تىكەلەي ەفيردە وتكىزسەك دەيمىن.
ا ق ش بيلىگى بۇل ۇسىنىسقا ازىرگە جاۋاپ بەرگەن جوق. پرەزيدەنت اكىمشىلىگى اق ءۇي باسشىسىنىڭ قولى بوس ەمەس ەكەنىن جەتكىزدى. ال 18 - ناۋرىزدا اق ءۇي اكىمشىلىگى رەسەيدىڭ وزگە قيمىلى ءۇشىن سانكسيالار اۋقىمىن كەڭەيتتى. الەكسەي ناۆالنىيدى ۋلاندىرۋ ارەكەتى ءۇشىن قارۋ- جاراق ەكسپورتى مەن يمپورتىنا جانە قورعانىس ماقساتىندا قولدانىلۋى مۇمكىن تەحنولوگيالارمەن بولىسۋگە تىيىم سالدى.
ايتا كەتۋ كەرەك، ا ق ش بارلاۋ قىزمەتىنىڭ مالىمەتىنشە، وتكەن جىلعى سايلاۋعا يران دا ارالاسقان ەكەن. يسلام رەسپۋبليكاسى كەرىسىنشە دونالد ترامپتىڭ قايتا سايلانۋىنا جول بەرمەۋگە تىرىسقان. بۇل ماقساتتا الەۋمەتتىك جەلىلەردە كوروناۆيرۋس ىندەتىنە قارسى كۇرەس ءتيىمسىز ءوتىپ جاتقانى، ا ق ش- تاعى ەكونوميكالىق قيىندىقتار مەن جاپپاي تارتىپسىزدىك تۋرالى اقپارات تاراتىپتى.
www.24.kz