ەۋرازيالىق ەكونوميكالىق وداق القاسىنىڭ ءتوراعاسى قازاقستان، قىرعىزستان جانە وزبەكستان پرەزيدەنتتەرىن ناۋرىز مەرەكەسىمەن قۇتتىقتادى

نۇر-سۇلتان. قازاقپارات - ەۋرازيالىق ەكونوميكالىق وداق القاسىنىڭ ءتوراعاسى ميحايل مياسنيكوۆيچ قازاقستان ق ر پرەزيدەنتى قاسىم-جومارت توقايەۆتى، قىرعىز رەسپۋبليكاسىنىڭ باسشىسى سادىر جاپاروۆتى جانە وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆتى حالىقارالىق ناۋرىز مەرەكەسىمەن قۇتتىقتادى، دەپ حابارلايدى قازاقپارات ە ا ە و باسپا ءسوز قىزمەتىنە سىلتەمە جاساپ.

«بۇل ەجەلگى تاماشا كوكتەم مەرەكەسى - قازاقستان، قىرعىزستان جانە وزبەكستان حالىقتارى مادەنيەتىنىڭ باي، تاريحي مۇراسىنىڭ ماڭىزدى، اجىراماس بولىگى. تابيعاتتىڭ كوكتەمگى جاڭارۋ كۇنى ەلدەرىڭىزدىڭ يگىلىگى ءۇشىن جاڭا اۋقىمدى جوبالاردى جۇزەگە اسىرۋعا سەرپىن بەرسىن»، - دەلىنگەن قۇتتىقتاۋ حاتىندا.

ميحايل مياسنيكوۆيچ مەملەكەت باسشىلارىنا مىقتى دەنساۋلىق پەن جاقسىلىق، ال قازاقستان، قىرعىزستان جانە وزبەكستان حالىقتارىنا بەيبىتشىلىك پەن باق-بەرەكە تىلەدى. «ناۋرىز» پارسى تىلىنەن اۋدارعاندا «جاڭا كۇن» دەگەن ماعىنانى بىلدىرەدى، 21-ناۋرىزدا اتاپ وتىلەدى. بۇل يران جانە تۇركى حالىقتارىنىڭ استرونوميالىق كۇن كۇنتىزبەسى بويىنشا كوكتەمنىڭ كەلۋ مەرەكەسى. ناۋرىز - ۇلتتىق ءداستۇر. 2009 -جىلعى 30-قىركۇيەكتە ناۋرىز يۋنەسكو-نىڭ ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەندى. وسى ۋاقىتتان باستاپ 21-ناۋرىز حالىقارالىق ناۋرىز مەرەكەسى بولىپ جاريالاندى. سونداي-اق ميحايل مياسنيكوۆيچ دميتري مەزەنسەۆتى وداقتاس مەملەكەتتىڭ مەملەكەتتىك حاتشىسى بولىپ تاعايىندالۋىمەن قۇتتىقتادى.

اۆتور: اياۋلىم التىنبەك