وقيعا ناۋرىزدىڭ 12 سىنەن 13 ىنە قاراعان ءتۇنى ساعات 23:30 شاماسىندا بولعان. كۇدىكتى كەنتاۋ قالاسىنىڭ جەرگىلىكتى تۇرعىنى جانە بۇرىن سوتتى بولعانى انىقتالدى. ول جولاۋشى رەتىندە كولىگىنىڭ ارتقى جاعىندا وتىرعان جىگىتتى جول بويىنا شىعارىپ الىپ، موينىنان پىشاق سۇققان. جاراقاتتانعان جىگىت، اۋرۋحانادا كوز جۇمدى. قازىرگى تاڭدا كۇدىكتى قاماۋدا، وعان قاتىستى ق ر ق ك-نىڭ 99-بابى 1-بولىگى («ادام ءولتىرۋ») بويىنشا سوتقا دەيىنگى تەرگەپ- تەكسەرۋ امالدارى جۇرگىزىلۋدە.
تۇركىستان وبلىسى پوليتسيا دەپارتامەنتىنىڭ Instagram-داعى رەسمي پاراقشاسىنا تۇركىستان قالاسىنىڭ تۇرعىنى جۇگىنىپ، نۇرلان ەسىمدى پوليتسيا قىزمەتكەرىنىڭ باتىرلىق ارەكەتىنە كۋا بولعانىن، سول ءۇشىن وعان العىس ايتقىسى كەلەتىنىن جەتكىزگەن. انىقتالعانداي، قالا تۇرعىنى تۇنگى ۋاقىتتا تۇركىستاننان كەنتاۋ قالاسىنا ءوز كولىگىمەن كەتىپ بارا جاتقاندا جول بويىندا جينالىپ تۇرعان ءبىر توپ ادامداردى كورگەن.
«جول- كولىك وقيعاسى بولدى ما، ادامدار نەگە جينالىپ تۇر دەپ مەن دە توقتاپ، جاقىندادىم. ءبىر جىگىت جولدىڭ ورتاسىندا ەكىنشى ءبىر جىگىتتىڭ موينىنا پىشاق سۇعىپ، ۇستىنە وتىرىپ الىپ، جىبەرمەي تۇر ەكەن. سول جەردە تۇرعان باسقا دا كۋاگەرلەرمەن بىرگە ەكەۋىن اجىراتپاقشى بولىپ، جابىرلەنۋشىنى قۇتقارعىمىز كەلىپ جاقىنداي بەرگەنىمىزدە، قولىنداعى پىشاعىن بىزگە سەرمەپ، «جاقىنداساڭدار بارلىعىڭدى ولتىرەمىن» دەپ ماڭىنا دا جولاتپادى. قورىققانىمىزدان نە ىستەرىمىزدى بىلمەي قالدىق. پوليتسيا مەن جەدەل جاردەمگە حابار بەردىك. سول ساتتە ءبىزدىڭ جانىمىزعا كولىك كەلىپ توقتادى دا، ىشىنەن ءبىر پوليتسيا قىزمەتكەرى اتىپ شىقتى. جۇگىرىپ بارىپ، قىلمىسكەردىڭ قولىنان شاپ بەرىپ، پىشاعىن الىپ، ونىڭ قارسىلاسقانىنا قاراماستان، قولىن قايىردى. وسىلايشا كوز الدىمىزدا ءبىز داۋالاماي تۇرعان وقيعانى بىردەن توقتاتتى. سالدەن سوڭ باسقا دا پوليتسيا قىزمەتكەرلەرى مەن جەدەل جاردەم كەلدى. ءبىز بىرنەشە ادامدار سول كەزدە ءوز- وزىمىزگە ارەڭ كەلىپ، پوليتسەيدىڭ قولىن قىسىپ، راقمەت ايتتىق»، - دەپ جازدى وقيعاعا كۋا بولعان تۇركىستاندىق.
ونىڭ ايتۋىنشا، ادامدار باتىل پوليتسەيدىڭ ەسىمىن عانا سۇراپ ۇلگەرگەن.
«وسى ءبىر وقيعا كوز الدىمدا بولعاندىقتان پوليتسەيدىڭ جاساعان ءىس-ارەكەتى ءۇشىن ونى قالاي دا تاۋىپ، ريزاشىلىعىمدى جەتكىزۋىم كەرەك دەپ ويلادىم. وسى ساتتە ق ر ءى ءى م- نە وسىنداي باتىر پوليتسەيلەردى جۇمىسقا الىپ، تاربيەلەگەندەرى ءۇشىن العىس ايتامىن. نۇرلان سياقتى پوليتسەيلەر كوپ بولسىن!»، - دەيدى قالا تۇرعىنى.
وسى حاتتان كەيىن پوليتسيا دەپارتامەنتىنىڭ قىزمەتكەرلەرى وقيعا كۋاگەرىنە پاراقشاعا قالدىرعان تەلەفون ءنومىرى بويىنشا حابارلاسقان. ءمالىم بولعانداي، قىلمىسكەردى قۇرىقتاعان پوليتسەي - كەنتاۋ قالالىق پوليتسيا ءبولىمىنىڭ ۋچاسكەلىك قىزمەتكەرى، مايور نۇرلان ابديەۆ. ن. ابديەۆتىڭ سوزىنشە، بارلىعى قاس-قاعىم ساتتە بولعان.
«ۋچاسكەلىك پوليتسەي بولعاندىقتان سول كۇنى تۇنگى شاقىرتۋدان شىعىپ، قىزمەت بابىمەن ارىپتەسىم - ۋچاسكەلىك پوليتسيا ينسپەكتورى، پوليتسيا مايورى ءبىرجان ابۋباكىرمەن بىرگە تۇركىستان قالاسىنا كەتىپ بارا جاتقان ەدىك. قاراساق، جولدىڭ ورتاسىندا ادامدار جينالىپ تۇر، جانىندا كولىك توقتاپ تۇر ەكەن. انىقتاپ قاراسام، بەلگىسىز ءبىر ازامات قولىندا پىشاعى بار، ەكىنشى ءبىر جىگىتتىڭ ۇستىنە شىعىپ الىپ، جىبەرمەي تۇر. بەرگى جاعىندا ادامدار جاقىنداي الماي ۇرەيلەنىپ تۇر ەكەن. كولىك توقتاي سالىسىمەن بىردەن ءتۇستىم دە، قىلمىسكەردىڭ ءسوزىن تىڭداماستان بىرنەشە ءادىس-ءتاسىلىمدى قولدانىپ، اركەز شىنىعىپ جۇرگەننىڭ ارقاسىندا ونى قۇرىقتاپ ۇلگەردىم. باسقا دا كۋاگەرلەرگە زيانىن تيگىزبەسىن دەپ ارىپتەستەرىم كەلگەنشە ۇستاپ وتىردىم. كۇدىكتىنىڭ قولىنا كىسەن سالىپ، پوليتسيا بولىمىنە جەتكىزدىك. سول ساتتە كۋاگەرلەر كەلىپ قولىمدى قىسىپ، العىس ايتتى. ءبىراق مەن بۇل ارەكەتىمدى باتىرلىق دەپ ەسەپتەمەيمىن، مەن تەك ءوز قىزمەتىمدى اتقاردىم. ءبىزدى قىزمەتكە العاش قابىلداعاندا «سەندەر جۇمىستا بولساڭدار دا، بولماساڭدار دا، قىلمىس ورىن السا، سول ساتتە ءتيىستى ارەكەتتى جاساپ، وقيعانىڭ ورشىمەۋىنە ىقپال ەتۋلەرىڭ كەرەك. ويتكەنى سەندەر پوليتسەيسىڭدەر» دەپ ۇيرەتكەن. سوندىقتان مەن ءوز مىندەتىمدى اتقاردىم»، - دەيدى پوليتسيا قىزمەتكەرى.