قىتاي جەرگىلىكتى ۆاكسينانى ەككەن شەتەلدىكتەرگە ۆيزا بەرۋ شارتتارىن جەڭىلدەتتى
بۇل تۋرالى ەلدىڭ سىرتقى ىستەر مينيسترلىگىنىڭ رەسمي وكىلى حابارلادى. دەگەنمەن نۋكلەين قىشقىلدارى مەن انتيدەنەلەرگە تەست تاپسىرۋ جانە قىتايعا كەلىسىمەن كارانتين ءوتۋ تالاپتارى ءالى ساقتالعان. قىتايدا ۆاكسينالاۋ ناۋقانى قارقىندى ءجۇرىپ جاتىر. قازىردىڭ وزىندە 65 ميلليوننان اسا ادامعا ەكپە ەگىلگەن. ەلدە ءتورت ءتۇرلى پرەپارات قولدانىلىپ جاتىر. بىرەۋى ۆەكتورلىق، ال قالعان ۇشەۋى - يناكتيۆتى ۆاكسينا.
ۆان جيۋنجي، قىتاي ينجەنەرلىك اكادەميانىڭ اكادەميگى:
- يناكتيۆتى ۆاكسينا ءبىر جاعىنان ۋاقىت سىناعىنان وتكەن ءداستۇرلى ءارى زاماناۋي پرەپارات بولىپ تابىلادى. وندايدا تۇتاس ءبىر ۆيرۋستى سان الۋان حيميكاتتارمەن زيانسىز قىلادى دا، بەلسەندىلىگىن تومەندەتەدى. بۇل ەكپەنىڭ ءتۇرى توڭازىتقىش نەمەسە ارنايى جۇك تاسىمالداۋ تالاپتارىن قاجەت ەتپەيدى. ولار دارىگەردىڭ كەڭسەسىندە ۇزاق ساقتالادى جانە تۇراقتى بولادى. الايدا وسى ءادىستىڭ ارتىقشىلىعىمەن قاتار، وزىندىك قيىنشىلىعى دا بار. ۆيرۋستاردى ءوسىرىپ، يناكتيۆاتسيا جاساۋ ءۇشىن ۇزاق ۋاقىت قاجەت. ال ۆەكتورلىق ۆاكتسينادا ادەنوۆيرۋستارعا كوروناۆيرۋستىڭ ءبىر عانا بولشەگىن قوسادى. بۇل ەكپەنى قىسقا مەرزىمدە ازىرلەۋگە بولادى. باعاسى دا تومەن.
قىتايدا قازىر 17 ۆاكسينا كلينيكالىق سىناقتان ءوتىپ جاتىر. جەرگىلىكتى بيلىك ءوندىرىستى ودان ءارى ۇلعايتۋعا نيەتتى. سەبەبى ۇجىمدىق يممۋنيتەتتى قالىپتاستىرۋ ماڭىزدى دەيدى ولار.
ۆان حۋاتسين، مەملەكەتتىك يممۋنداۋ باعدارلاماسىنىڭ باس مامانى:
- ەكپەنىڭ تيىمدىلىگى - ونى ەكتىرگەن ازاماتتاردىڭ سانى ۇجىمدىق يممۋنيتەتتى قالىپتاستىرادى. ماسەلەن، شەشەك اۋرۋىن جەڭۋ ءۇشىن ادامداردىڭ 85 پروتسەنتىندە ۆيرۋسقا قارسى يممۋنيتەتى بولۋى كەرەك.
ايتا كەتەيىك، قىتاي الەمدە ءبىرىنشى بولىپ ۆاكسينا ءتولقۇجاتتارىن بەرۋ باعدارلاماسىن ىسكە قوستى. كوروناۆيرۋسقا قارسى جەرگىلىكتى ەكپە العان شەتەلدىكتەرگە، بۇگىندە ۆيزا الۋ پروتسەسى جەڭىلدەتىلگەن.