پاتەردىڭ باعاسى ءبىر ميلليون دوللار - قىتايدا باسپانا قىمباتتاپ بارادى
بەيجىڭ، شاڭحاي جانە گۋاڭجوۋ سەكىلدى الىپ شاھارلاردا جاڭا پاتەرلەر جارتى پروتسەنتكە قىمباتتادى. بۇل وتكەن ايمەن سالىستىرعانداعى كورسەتكىش. جالپى جىلجىمايتىن مۇلىكتىڭ باعاسى ءۇش جىل بويى ۇنەمى ءوسىپ كەلەدى.
قىتاي ۇكىمەتى «پاتەرلەردى الىپساتارلىق ماقساتتا ەمەس، وندا تۇرۋ ءۇشىن ساتىپ الۋ كەرەك» دەيدى. 70- جىلدارى قىتايدا وتاۋ قۇرۋ ءۇشىن جاستاردىڭ مەنشىگىندە ساعات، ۆەلوسيپەد جانە تىگىن ماشيناسى بولۋ ماڭىزدى ەدى. ال 40 جىل وتكەننەن كەيىن وتباسىعا قاجەتتى قۇندىلىقتار وزگەردى. ەندى ەڭ باستى دۇنيە باسپانا، كولىك پەن قاراجات. ماسەلەن بەيجىڭ قالاسىندا اۋدانى 70 شارشى مەتر پاتەردىڭ باعاسى ءبىر ميلليون دوللار توڭىرەگىندە. ونى ساتىپ الۋ ءۇشىن وتباسى ورتا ەسەپپەن 30 جىلداي اقشا جيناۋى كەرەك. سوڭعى 20 جىلدا قىتايدا ءۇي باعاسى 5 ەسە قىمباتتاعان. ال بەيجىڭ قالالاسىندا 2002 -جىلى ءبىر شارشى مەتردىڭ قۇنى 4500 يۋان بولسا، 2020 -جىلى 58 مىڭعا دەيىن كوتەرىلىپ كەتتى. بۇل 9 مىڭ دوللارمەن شامالاس سوما.
ماماندار «جىلجىمايتىن مۇلىك نارىعىنداعى الىپساتارلىق پەن يپوتەكالىق نەسيە بويىنشا جوعارى پروتسەنتتەر داعدارىسقا اكەلۋى مۇمكىن»، دەيدى.
گو شۋتسين، ق ح ر ورتالىق بانكى پارتيا كوميتەتىنىڭ جەتەكشىسى:
- 2020 -جىلى تۇرعىن ءۇي نارىعىندا نەسيە بەرۋ قارقىنى باسەڭدەدى. بۇل سوڭعى سەگىز جىلدا العاش رەت بولىپ تۇر. سونداي- اق جەر مەن جىلجىمايتىن مۇلىك باعالارىن تۇراقتاندىرۋ ءۇشىن ءتۇرلى شارالار قابىلداپ كەلەمىز. وسى نارىقتاعى ماسەلەلەر بىرتىندەپ شەشىلىپ جاتىر. الايدا باسپانانى ينۆەستيتسيا رەتىندە نەمەسە الىپساتارلىق ماقساتتا ساتىپ الۋ ءبىزدى قاتتى الاڭداتىپ وتىر.
بيىلدان باستاپ بيلىك جاستاردى باسپانامەن قامتۋ ماسەلەسىنە دەن قويا باستادى. جاستارعا اسىرەسە، ءىرى شاھارلاردا پاتەر ساتىپ الۋ قيىن. سوندىقتان ۇكىمەت جالعا بەرىلەتىن تۇرعىن ۇيلەرگە باسىمدىق بەرمەك.
سۋن گوتسزيۋن، ق ح ر مەملەكەتتىك كەڭەسى زەرتتەۋ ينستيتۋتىنىڭ ساراپشىسى:
- حالىقتى تۇرعىن ۇيمەن قامتاماسىز ەتۋدە ءبىرقاتار ماسەلە بار. ءبىر جاعىنان ءبىز جالدامالى ۇيلەردىڭ قۇرىلىس قارقىنىن ارتتىرامىز. ازاماتتارعا جەر تەلىمدەرىن بەرۋ مەن ارنايى قارجىلاندىرۋ بويىنشا قولداۋ كورسەتىلەدى. ەكىنشى جاعىنان وسى سالاداعى ۇزاقمەرزىمدى ساياساتتى جاقسارتىپ، جالداۋ قۇنىن باقىلاۋ قاجەت.
قازىر قىتايلىق جاستاردىڭ وتباسىن قۇرۋعا اسىقپاۋىنىڭ بىردەن ءبىر سەبەبى تۇرعىن ءۇي ماسەلەسى بولىپ تۇر. وسىعان بايلانىستى ەل بيلىگى ازاماتتاردى شاڭىراق كوتەرىپ، بالالى بولۋعا ىنتالاندىرۋ ءۇشىن ءتۇرلى شارالاردى قولعا الا باستادى. سونىڭ ءبىرى - باسپانا ماسەلەسى. بۇدان بولەك، قىتاي ۇكىمەتى ەلدەگى ۋربانيزاتسيا كولەمىن % 65- كە جەتكىزبەك نيەتتە. بۇل قالاعا قونىس اۋداراتىندار قاتارى كوبەيە تۇسەدى دەگەن ءسوز.
www.24.kz