كوروناۆيرۋس: قاراعاندى وبلىسىندا حالىقتى ۆاكسينالاۋ جۇرگىزىلۋدە
لوبودا كوشەسىندەگى وتباسىلىق دەنساۋلىق ورتالىعىندا كۇنىنە 100 ەرىكتى ۆاكسيناتسيالانادى. ولاردىڭ اراسىندا دارىگەرلەر، پەداگوگتار جانە قاراعاندىنىڭ قاراپايىم تۇرعىندارى بار. ۆاكسينانى كەم دەگەندە 18 جاستاعى ادامدار الا الادى.
«ءبىز كۇن سايىن دارىگەرلەر مەن پەداگوگتار ساناتىنا جاتپايتىن 15 ەرىكتىنى ۆاكسيناتسيالايمىز. قازىرگى ۋاقىتتا بىزدە 72 ادام ەكپە الدى. ۆاكسيناتسياعا بىزگە تىركەلگەن ازاماتتار، سونداي- اق «گيپپوكرات» كلينيكاسىنىڭ فيليالى مەن مەديتسينا ۋنيۆەرسيتەتىنىڭ ستۋدەنتتەرى جازىلا الادى. ادامدار بەلسەندى جازىلىپ جاتىر. ۆاكسينا جەتكىلىكتى. دارىگەرلەر «سپۋتنيك- V « ءبىر بوتەلكەسى بەس ادامعا ارنالعان ەكەنىن ەسكە سالادى. ناۋقاس ءوز كەزەگىن ۇزاق كۇتپەۋى ءۇشىن جازبا بەس ادامدى بىرىكتىرۋگە مۇمكىندىك بەرەدى»، - دەيدى قالالىق العاشقى مەديتسينالىق- سانيتارلىق كومەك ورتالىعىنىڭ ديرەكتورى تاتيانا باشيروۆا.
ۆاكسيناتسيا ساۋالنامانى تولتىرۋدان باستالادى. ول جالپى جاعدايدى جانە سوزىلمالى اۋرۋلاردى سيپاتتايدى. سودان كەيىن ناۋقاستى دارىگەر تەكسەرەدى. ەگەر قارسى كورسەتىلىمدەر بولماسا، وندا ادام ۆاكسيناتسيادان وتەدى. ينەكسيادان كەيىن ۆاكسيناتسيادان كەيىنگى باقىلاۋ ايماعىندا 30 مينۋت بولۋ كەرەك. دارىگەرلەر ناۋقاستىڭ جاعدايىن مۇقيات قاداعالايدى. شۇعىل جانە شتاتتان تىس جاعدايلار ءۇشىن ورتالىقتا شۇعىل مەديتسينالىق كومەك ايماعى جابدىقتالعان.
«بۇگىن مەن ەكپە الۋعا جۇبايىممەن كەلدىم. ءبىز ۆاكسينانىڭ پايدا بولۋىن كۇتتىك. «سپۋتنيك- V « تۋرالى كوپ وقىدىق جانە ونىڭ تيىمدىلىگىنە سەنىمدىمىز. ءبىز ۆاكسيناتسيانى تەگىن جاساي الاتىنىمىزعا قۋانىشتىمىن. بارلىق دارىگەرلەر مەيىرىمدى جانە ۆاكسيناتسيا كەزىندە ءار كەزەڭدى تۇسىندىرەدى»، - دەدى قاراعاندىلىق كريستينا توكار.
اۆتور: اگاتا مۋحامەدجانوۆا