قازاقستاندا كوللەدجدەردە قابىلداۋ ەمتيحاندارى بولمايدى
بۇل تۋرالى ق ر ءبىلىم جانە عىلىم ۆيتسە-ءمينيسترى بيبىگۇل اسىلوۆا ءمالىم ەتتى، دەپ حابارلايدى قازاقپارات ءتىلشىسى.
«مينيسترلىك جەرگىلىك اتقارۋشى ورگاندارمەن بىرلەسە قاراجاتتى ناقتى ستۋدەنتكە بەكىتۋ ۇستانىمى بويىنشا مەملەكەتتىك تاپسىرىستى ورنالاستىرۋدىڭ جاڭا تەتىگى دايارلاندى. ەگەر وسىعان دەيىن وڭىرلەردىڭ ءبىلىم باسقارماسى كوللەدجدەر اراسىندا مەملەكەتتىك تاپسىرىستى وزدەرى ورنالاستىرسا، ەندى جاڭا مەحانيزم بويىنشا ج و و-عا جانە «بالاپان» باعدارماسىنا ۇقساس ابيتۋرەنتتەر كوللەدجدى ءارى ماماندىقتى وزدەرى تاڭدايدى»، - دەدى ۆيتسە- مينيستر ءماجىلىستىڭ الەۋمەتتىك- مادەني دامۋ كوميتەتىنىڭ كەڭەيتىلگەن وتىرىسىندا.
وسى ورايدا ول جاڭا ەرەجە بويىنشا ابيتۋرەنتتەر كوللەدجگە قالاي تۇسەتىنىن ايتىپ بەردى.
«جاڭا مەحانيزمگە سايكەس، پەداگوگيكالىق، مەديتسينالىق جانە شىعارماشىلىق ماماندىقتار بويىنشا ارنايى سىناقتاردان بولەك، كوللەدجدەردە قابىلداۋ ەمتيحانى بولمايدى»، - دەدى ب. اسىلوۆا. بۇدان بۇرىن حابارلانعانداي، تەحنيكالىق جانە كاسىپتىك ءبىلىم بەرۋ سالاسىندا مەملەكەتتىك تاپسىرىستى قالىپتاستىرۋ مەن ورنالاستىرۋدىڭ جاڭا ەرەجەسى ازىرلەندى.
«مينيسترلىك كادرلار بويىنشا ەكونوميكانىڭ ورتا ءارى ۇزاق مەرزىمدەگى قاجەتتىگىنىڭ بولجامىن، وڭىرلىك ەڭبەك نارىعىن جانە جاڭا كاسىپتەر مەن قۇزىرەتتەردىڭ اتلاسىن ەسكەرە وتىرىپ، مەملەكەتتىك تاپسىرىستى قالىپتاستىرۋ مەن ورنالاستىرردىڭ ەرەجەسىن ازىرلەدى»، - دەدى ۆيتسە- مينيستر.
اۆتور: رۋسلان عابباسوۆ