ناريمان تابىنبايەۆ 13-ناۋرىزدا بولعان اۋە اپاتىنان زارداپ شەككەن ەكى ادام №4-قالالىق كلينيكالىق اۋرۋحاناعا ساعات 18: 05-تە وتە اۋىر جاعدايدا تۇسكەنىن ايتتى.
«1990 -جىلى تۋعان ناۋقاستىڭ دياگنوزى: ارالاس جاراقات، باسسۇيەك- ميدىڭ جابىق جاراقاتى، كەۋدە قۋىسىنىڭ كوپتەگەن سىنۋى، اياقتىڭ سىنۋى، ءىش جاراقاتى، وكپەنىڭ جاراقاتتانۋى
جانە كۇيىك شالۋ. اۋرۋحاناعا تۇسكەن العاشقى مينۋتتان باستاپ ول شوكقا قارسى شارالار قابىلدادى. بارلىق كۇش جاعدايىن تۇراقتاندىرۋعا باعىتتالدى. سىنعان اياعىنا جەدەل حيرۋرگيالىق وپەراتسيا جاسالدى. ەكىنشى ناۋقاس 1996 -جىلى تۋعان. وعاندا ءتۇرلى دەنە جاراقاتى دياگنوزى قويىلدى. باسسۇيەك- ميدىڭ جابىق جاراقاتى، ونىڭ ومىرتقاسى سىنعان. ەكەۋى دە بىلىكتى مامانداردىڭ باقىلاۋىندا»، - دەدى ناريمان تابىنبايەۆ.
ونىڭ ايتۋىنشا، ولاردىڭ ومىرىنە تونگەن قاۋىپ سەيىلدى.
«دەسەكتە ۇلكەن جاراقات بار ەكەنىن ءتۇسىنۋىمىز كەرەك. سونداي- اق، اسقىندىراتىن فاكتور بار - ول كۇيىك جاراقاتتارى. ولاردىڭ وزىندىك كەزەڭدەرى بار. سوندىقتان، ءبىز مۇمكىن اسقىنۋلاردان قورقامىز. ءبىزدىڭ بارلىق مامانداردى جۇمىلدىردىق. اتاپ ايتسام، رەانيماتولوگتار، تراۆماتولوگتار، حيرۋرگتەر. ءبىز ولاردىڭ ءومىرىن ساقتاپ قالۋ ءۇشىن كۇرەسەمىز. قازىر سىرتتان مامان شاقىرۋدىڭ قاجەتى جوق. ءبىزدىڭ ناۋقاستاردىڭ جاعدايى تۇراقتالادى دەپ سەنەمىز»، - دەدى سپيكەر.
ەسكە سالا كەتەيىك، كەشە نۇر-سۇلتان- الماتى باعىتىندا كەلە جاتقان ان-26 اسكەري ۇشاعى 17.22 كەزىندە راداردان جوعالىپ، قالا اۋەجايى ماڭىندا اپاتقا ۇشىراعان ەدى. ۇشاقتا بولعان 4 ادام قازا تاپتى. 2 ادام ءتۇرلى جاراقاتپەن الماتى قالاسىنىڭ №4-قالالىق كلينيكالىق اۋرۋحاناسىنا جەتكىزىلدى. كەيىننەن الماتى دارىگەرلەرى ۇشاق اپاتىنان جاپا شەككەن ەكى ادامنىڭ دەنساۋلىعى قالاي ەكەنىن ايتتى.
ۇشاق اپاتى بولعان جەرگە قالا اكىمى باقىتجان ساعىنتايەۆ بارىپ، زارداپ شەككەندەرگە بارىنشا كومەك كورسەتۋدى تاپسىردى. سونىمەن قاتار، مەملەكەت باسشىسى اۋە اپاتىنىڭ سەبەپتەرىن انىقتاۋدى تاپسىرعان بولاتىن.
قازاقستان رەسپۋبليكاسى ۇلتتىق قاۋىپسىزدىك كوميتەتى الماتىدا اپاتقا ۇشىراعان ۇشاقتىڭ قارا جاشىگىندەگى دەرەكتەر تەكسەرىلىپ جاتقاندىعىن ءمالىم ەتتى.
اۆتور: الما مۇقانوۆا