كارانتين: ەلوردادا قوعامدىق ورىنداردا شەكتەۋ ەنگىزىلەدى

نۇر-سۇلتان. قازاقپارات - ەلوردانىڭ «قىزىل ايماققا» وتكەنى ەسكەرىلىپ، كەشە باس سانيتارلىق دارىگەر قوسىمشا شەكتەۋ شارالارىن قابىلدادى.

بۇل تۋرالى ۇكىمەت وتىرىسىندا نۇر-سۇلتان قالاسىنىڭ اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.

«وتكەن تاۋلىكتە كوروناۆيرۋس جۇقتىرۋدىڭ 127 جاعدايى تىركەلدى. رەپرودۋكتيۆتى كورسەتكىشتىڭ سانى بىردەن اسىپ تۇر. قالانىڭ «قىزىل ايماققا» وتكەنى ەسكەرىلىپ، كەشە باس سانيتارلىق دارىگەر قوسىمشا شەكتەۋ شارالارىن قابىلدادى. ولار حالىق كوپ جينالاتىن ورىنداردىڭ قىزمەتىنە قاتىستى. اتاپ ايتقاندا، ويىن- ساۋىق ورتالىقتارى، ساۋدا ورىندارى، قوعامدىق كولىك، مەكتەپ، مەيرامحانا جانەكلۋبتار، كينوتەاترلار مەن فيتنەس ورتالىقتارى جانە باسقا دا نىساندار»، - دەيدى نۇر-سۇلتان قالاسىنىڭ اكىمى التاي كولگىنوۆ.

ونىڭ ايتۋىنشا، ىندەتتىڭ جۇقتىرۋدىڭ ودان ءارى تارالۋىنا جول بەرمەس ءۇشىن ءبىرقاتار شارا قابىلدانعان.

«ينفەكسيالىق ستاتسيونارلاردا ازىرگە 720 توسەك ازىرلەنگەن. كوروناۆيرۋس راستالعان 331 ادام، پنيەۆمونيامەن 31 ادام ەمدەلۋدە. بارلىق ستاتسيونار مەديتسينالىق بۇيىمدارمەن جانە دارىلىك زاتتارمەن قامتاماسىز ەتىلگەن. رەزەرۆتە 7 مىڭ توسەك- ورىن بار»، - دەيدى ول.

اۆتور: زارينا قاھارمان