كوروناۆيرۋس: اسقار مامين دەنساۋلىق ءمينيسترى مەن اكىمدەرگە ءبىرقاتار تاپسىرما بەردى
بۇل تۋرالى ۇكىمەت وتىرىسىندا ق ر پرەمەر- ءمينيسترى اسقار مامين ايتتى، دەپ حابارلايدى قازاقپارات ءتىلشىسى.
«ءساۋىر ايىندا ۆاكسينا الاتىنداردىڭ، اسىرەسە ەگدە جاستاعى ادامداردىڭ سانى ەلەۋلى ارتاتىن بولادى. بۇل شارالار تۇرعىنداردا ۇجىمدىق يممۋنيتەت قالىپتاستىرىپ، ينفەكسيانىڭ ودان ءارى تارالۋىن شەكتەۋگە مۇمكىندىك بەرەدى. وسى فاكتور پاندەميامەن كۇرەسۋدە جانە ەكونوميكالىق ءوسۋدى قالپىنا كەلتىرۋدە اسا ماڭىزدى بولىپ سانالادى»، - دەيدى ق ر پرەمەر-ءمينيسترى اسقار مامين.
وسىعان بايلانىستى ول دەنساۋلىق ساقتاۋ مينيسترلىگى مەن ءوڭىر اكىمدەرىنە ءبىرقاتار تاپسىرما جۇكتەدى.
«ءبىرىنشى، اكىمدىكتەر مەن دەنساۋلىق ساقتاۋ مينيسترلىگى ۆاكسينا الاتىنداردىڭ سانىن ارتتىرۋدى قامتاماسىز ەتسىن. ول ءۇشىن ۆاكسينانى ساقتاۋ مەن تاسىمالداۋ ءۇشىن قاجەتتى جاعدايلارى بار ەگۋ كابينەتتەرىن قوسىمشا اشۋ كەرەك. اقپارات مينيسترلىگىمەن بىرلەسىپ، حالىققا اقپاراتتىق- ءتۇسىندىرۋ جۇمىستارىن كۇشەيتۋ قاجەت. اكىمدىكتەردىڭ سايتىندا ۆاكسيناتسيا، ونىڭ پايداسى مەن ەگۋ پۋنكتەرىنىڭ مەكەنجايلارى تۋرالى ناقتى اقپارات جوق. حالىق اراسىندا ۆاكسينالاۋدىڭ ماڭىزدىلىعى تۋرالى دۇرىس پىكىر قالىپتاستىرۋ ءۇشىن قوعام مەن مەديتسينا قىزمەتكەرلەرىنىڭ اراسىندا سەمينارلار ۇيىمداستىرۋ كەرەك. دەنساۋلىق ساقتاۋ مينيسترلىگىنە ناۋرىز ايىنىڭ سوڭىنا دەيىن ەگۋ پۋنكتەرىنىڭ دايىندىعىن باقىلاپ، ۆاكسينانى قاجەتتى كولەمدە، ۋاقىتىلى جەتكىزۋ ءۇشىن بارلىق ماسەلەلەردى شەشۋدى تاپسىرامىن»، - دەدى ول.
سونداي-اق ا. مامين ءوڭىر اكىمدىكتەرى تۇرعىنداردىڭ، اسىرەسە، ۇجىمداردا، ءبىلىم بەرۋ ۇيىمدارىندا شەكتەۋ شارالارىنىڭ ساقتالۋىن قامتاماسىز ەتۋدى تاپسىردى.
«ەكىنشى، ادامدار كوپ جينالاتىن ويىن- ساۋىق ءىس-شارالارىنىڭ وتكىزىلۋىنە جول بەرىلمەسىن. الداعى مەرەكە كۇندەرى وسىنى ەستەن شىعارماۋ كەرەك. ىشكى ىستەر، دەنساۋلىق ساقتاۋ مينيسترلىكتەرىمەن بىرلەسىپ، مونيتورينگىلەۋ توپتارىنىڭ جۇمىسىن كۇشەيتسىن جانە ءتارتىپ بۇزۋشىلاردى قاتاڭ جاۋاپقا تارتسىن. ءۇشىنشى، دەنساۋلىق ساقتاۋ مينيسترلىگى اكىمدىكتەرمەن بىرلەسىپ، اۋرۋ وشاقتارىندا جەدەل شارا قولدانىپ، شەكتەۋ شارالارىن قايتا قاراسىن. ناۋقاستارمەن بايلانىستا بولعان بارلىق ادامدارعا كوروناۆيرۋسقا تەستىلەۋ مىندەتتى تۇردە جۇرگىزىلىپ، باقىلاۋدا بولۋى كەرەك. بۇل رەتتە كۇندەلىكتى جۇرگىزىلەتىن پ ت ر- تەستىلەۋ دەڭگەيى تومەندەمەۋى ءتيىس»، - دەيدى ق ر پرەمەر-ءمينيسترى اسقار مامين.