بۇل تۋرالى قازاقپارات نۇر- سۇلتان قالاسىنىڭ پوليتسيا دەپارتامەنتىنە سىلتەمە جاساپ حابارلايدى. پوليتسياعا قالانىڭ تۇرعىنى كەلىپ، 15-ناۋرىز تۇنگى ساعات 02:50-دە كۇيشى دينا كوشەسىندە «لادا ۆاز 2114» كولىگىن بەلگىسىز بىرەۋلەردىڭ ايداپ اكەتكەنىن ايتقان. كولىك يەسى وتالىپ تۇرعان كولىگىن بىرنەشە مينۋتقا قالدىرىپ كەتكەن بولاتىن. تەرگەۋ بارىسىندا 22 جانە 21 جاستاعى ەكى جاس ازاماتتىڭ الدىن الا ويلاستىرعان جوسپارمەن جۇمىس ىستەگەنى بەلگىلى بولدى. قاسكۇنەمدەر وتالىپ تۇرىپ، يەسىز قالعان كولىكتەردى اڭدىپ ءجۇرىپ، تەرىس ويىن سولاي جۇزەگە اسىرعان. ج ب و- نىڭ بەينەباقىلاۋ تاسپالارى ۇرلانعان كولىكتىڭ قابانباي باتىر داڭعىلىندا مەملەكەتتىك تىركەۋ ءنومىرىنسىز قورعالجىن تاسجولىنا كەتىپ بارا جاتقانىن انىقتادى. پوليتسيا جاساعى كۇدىكتىلەردى ۇستادى. اتالعان فاكتىمەن قىلمىستىق ءىس قوزعالدى. كۇدىكتىلەردىڭ ەلوردا اۋماعىندا وسىعان ۇقساس قىلمىستارعا قاتىسى انىقتالۋ ۇستىندە.
نۇر- سۇلتان قالاسىنىڭ پوليتسيا دەپارتامەنتى ازاماتتاردى قىراعى بولىپ، كولىگىنەن شىققاندا ونىڭ ەسىك- تەرەزەلەرىنىڭ دۇرىس جابىلعانىن تەكسەرۋدى سۇرايدى. كولىكتىڭ ۇرلانۋىن بولدىرماۋ جانە قاۋىپسىزدىگىن قامتاماسىز ەتۋ ماقساتىندا پوليتسەيلەر كولىك يەلەرىنە ونى وتالعان كۇيدە قالدىرىپ كەتپەۋىن، دابىل جۇيەسىن ورناتۋدى، كولىكتەردى كۇزەتىلەتىن اۆتوتۇراقتارعا قويىپ كەتۋدى كەڭەس ەتەدى. زاڭعا قايشى ارەكەتتەرگە تاپ بولعان ازاماتتار پوليتسيانىڭ 102 نومىرىنە حابارلاسا الادى.