«بيىل 26 - اقپاندا مەملەكەت باسشىسى مەملەكەتتىك باسقارۋدىڭ ادامدارعا باعىتتالعان مودەلىن دامىتۋ تۇجىرىمداماسىن ماقۇلدادى. مەملەكەتتىك باسقارۋ حالىقتىڭ ءۇمىتىن اقتاۋى كەرەك. سونىمەن بىرگە، ازاماتتىق بەلسەندىلىكتىڭ ەداۋىر ارتۋى قازاقستاندىق قوعامنىڭ جەتىلگەندىگىن جانە مەملەكەتتىك باسقارۋ پروتسەسىنە قاتىسۋ قاجەتتىلىگىن كورسەتەدى. تۇجىرىمداما ازاماتتاردىڭ مەملەكەتپەن ءوزارا قارىم- قاتىناسىن جاقسارتۋعا، مەملەكەتتىك جوسپارلاۋدىڭ تيىمدىلىگىن، مەملەكەتتىك قىزمەت كادرلارىنىڭ ساپاسىن ارتتىرۋعا، مەملەكەتتىك قىزمەت كورسەتۋدىڭ بەلسەندى فورماتىنا اۋىسۋعا، نورماتيۆتىك- قۇقىقتىق جانە سىبايلاس جەمقورلىققا قارسى ساياساتتى جەتىلدىرۋگە، سونىمەن قاتار سوت جانە قۇقىق قورعاۋ جۇيەسىن وزگەرتۋگە باعىتتالعان»، - دەيدى ق ر مەملەكەتتىك قىزمەت ىستەرى اگەنتتىگىنىڭ ءتوراعاسى.
ونىڭ ايتۋىنشا، مەملەكەتتىك باسقارۋدىڭ جاڭا مودەلى «حالىق ۇنىنە قۇلاق اساتىن»، كاسىبي جانە پراگماتيكالىق مەملەكەت قاعيداتىنا نەگىزدەلگەن بولادى.
«تۇجىرىمداماعا ساي كەلەتىن مەملەكەتتىك باسقارۋعا قول جەتكىزۋ ءۇشىن «تۇلعاعا باعدارلانعان» مودەل قۇرۋدان باستاپ، وڭتايلى، كليەنتكە باعدارلانعان جانە اشىق مەملەكەتتىك اپپارات قالىپتاستىرۋ جوسپارلانۋدا. سونداي- اق، ازاماتتاردىڭ قاجەتتىلىگىنە نەگىزدەلگەن مەملەكەتتىك قىزمەتتەردى بەلسەندى كورسەتۋگە كوشۋ، كادرلار ساپاسىن ارتتىرۋ جانە مەملەكەتتىك اپپاراتتىڭ كاسىبيلەنۋى قاراستىرىلادى. كادرلار ساپاسىن جاقسارتۋ جانە مەملەكەتتىك اپپاراتتىڭ كاسىبيلەندىرىلۋى، سوت جانە قۇقىق قورعاۋ جۇيەسىن قايتا قۇرۋ جوسپارلانۋدا»، - دەيدى انار جايىلعانوۆا.
اۆتور: زارينا قاھارمان