مەرزىمى وتكەن تەڭگە بانكنوتتارىن ايىرباستاۋ مەرزىمى وزگەرەدى
بۇل جايىندا ءماجىلىس دەپۋتاتتارىنىڭ ساۋالىنا ق ر ۇلتتىق بانكى ءتوراعاسى ەربولات دوسايەۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«2006 -جىلعى ۇلگىدەگى نومينالى 2000، 5000 جانە 10000 تەڭگەلىك بانكنوتتار 2006 -جىلعى 15-قاراشادا اينالىسقا شىعارىلدى جانە 2016 -جىلعى 4-قازاننان باستاپ زاڭدى تولەم قۇرالى بولۋىن توقتاتتى. ەكىنشى دەڭگەيدەگى بانكتەر مەن ۇلتتىق پوشتا وپەراتورى 2016 -جىلدان باستاپ 12 اي ىشىندە جانە ۇلتتىق بانكتىڭ فيليالدارى 2020 -جىلعى 5-قازانعا دەيىن جوعارىدا كورسەتىلگەن بانكنوتتاردى قابىلداپ، ۇلتتىق ۆاليۋتانىڭ قولدانىستاعى اقشا بەلگىلەرىنە ايىرباستادى»، - دەدى ەربولات دوسايەۆ.
ونىڭ اتاپ وتۋىنشە، بۇعان دەيىن ۇلتتىق بانك بارلىق ازاماتتار ەسكى بانكنوتتاردى ۋاقتىلى ايىرباستاي الماۋىنا بايلانىستى 2006 -جىلعى ۇلگىدەگى نومينالى 2000، 5000 جانە 10000 تەڭگەلىك بانكنوتتاردى قابىلداۋ مەن اۋىستىرۋ مەرزىمىن 2021 -جىلعى 1-اقپانعا دەيىن ۇزارتقان بولاتىن. ەندى، بۇل شەشىمگە تاعى وزگەرىس ەنگىزىلگەلى وتىر.
«سونىمەن قاتار، ۇلتتىق بانك كەلىپ تۇسكەن ازاماتتاردىڭ وتىنىشتەرىن ەسكەرە وتىرىپ، سونداي-اق حالىقارالىق تاجىريبەنى نازارعا الىپ، ۇلتتىق بانك فيليالدارىنىڭ 2006 -جىلعى ۇلگىدەگى بانكنوتتاردى جانە كەيىنگى جىلدارى شىعارىلعان بانكنوتتاردى ايىرباستاۋىنىڭ مەرزىمسىز كەزەڭىن ەنگىزۋ تۋرالى شەشىم قابىلدايدى. ۇلتتىق بانكتىڭ اكتىلەرىنە ءتيىستى وزگەرىستەر ەنگىزىلگەننەن كەيىن 2006 -جىلعى ۇلگىدەگى بانكنوتتاردى مەرزىمسىز ايىرباستاۋ جونىندەگى اقپارات ۇلتتىق بانكتىڭ رەسمي سايتىندا جانە بۇقارالىق اقپارات قۇرالدارىندا ورنالاستىرىلادى»، - دەدى ول.