قاراعاندى قالاسىنىڭ وكتيابر اۋدانىنا ءاليحان بوكەيحان ەسىمى بەرىلەتىن بولدى

قاراعاندى. قازاقپارات - قاراعاندى قالاسىنىڭ اكىمدىگى وكتيابر اۋدانىن ءاليحان بوكەيحان اتىنداعى اۋدان دەپ قايتا اتاۋ جونىندە قاراعاندى قالالىق ءماسليحاتىنا ۇسىنىس ەنگىزدى.

وسىعان وراي قوعامدىق كەڭەس ۇيىمداستىرىلىپ، وعان 700-گە جۋىق ادام قاتىستى. جينالعانداردىڭ باسىم بولىگى اۋداننىڭ قايتا اتالۋىن قولدادى، دەپ حابارلايدى قازاقپارات ءتىلشىسى.

2021 -جىلعى 12-ناۋرىزدا قاراعاندى قالالىق ءماسليحاتى اۋداندى قايتا اتاۋ بويىنشا جاريا تىڭداۋلار وتكىزدى. قوعامدىق تىڭداۋلارعا قالالىق ءماسليحات دەپۋتاتتارى، قاراعاندى قالاسىنىڭ قوعامدىق كەڭەس مۇشەلەرى، قالا تۇرعىندارى، ب ا ق وكىلدەرى قاتىستى.

قاراعاندى وبلىسىنىڭ باس مەملەكەتتىك سانيتارلىق دارىگەرىنىڭ 9-ناۋرىزداعى № 6-ق قاۋلىسىنا سايكەس سانيتارلىق نورمالاردى قامتاماسىز ەتۋ ءۇشىن مايقۇدىق، سۇرىپتاۋ جانە پريشاحتينسكىدەگى 10 وبەكتىدە جاريا تىڭداۋلار وتكىزىلدى. الايدا، نيەت بىلدىرۋشىلەر كوپ بولعانى سونشالىق، ميكروفوندار مەن ەكراندار ورناتىلعان قوسىمشا الاڭدار ۇيىمداستىرىلدى. بارلىعى 15 زال بولدى. بارلىق الاڭداردا 685 قاراعاندىلىق قاتىستى. الدىن الا مالىمەتتەر بويىنشا، كوپشىلىك وكتيابر اۋدانىنىڭ اتاۋىن وزگەرتۋدى قولداپ، داۋىس بەردى. «اۋداننىڭ اتاۋىن وزگەرتۋ - بۇل يدەولوگيا، رۋحانيات ماسەلەسى. ءبىز سانامىزدى جاڭارتىپ، الدىمىزعا جاڭا ماقساتتار مەن مىندەتتەر قويۋىمىز كەرەك»، - دەدى قالالىق ءماسليحات دەپۋتاتى بەرىك قۇلماعانبەت.

«قوعامدىق تىڭداۋلاردىڭ قورىتىندىسى بويىنشا قالانىڭ وكتيابر اۋدانىن ءاليحان بوكەيحان اتىنداعى اۋدان ەتىپ وزگەرتۋ تۋرالى ۇسىنىس ءبىراۋىزدان قولداۋ تاپتى دەگەن حاباردى مەن زور قۋانىشپەن قابىلدادىم! بارلىق قاراعاندىلىقتاردى وسى ايتۋلى وقيعامەن قۇتتىقتايمىن!»، - دەپ جازدى Facebook-تەگى پاراقشاسىندا قالا اكىمى ەرماعانبەت بولەكبايەۆ.

«اكىمدىك ءتيىستى قاۋلى شىعارادى، ءماسليحات تالقىلايدى جانە شەشىم شىعارادى. بۇدان ءارى قۇجاتتار رەسپۋبليكالىق ونوماستيكالىق كوميسسياعا جىبەرىلەدى. وسى ورگانمەن كەلىسىم بويىنشا ولار قايتادان وبلىس اكىمدىگىنە جىبەرىلەدى، وبلىستىق ءماسليحاتتا قارالادى جانە ادىلەت ورگاندارىندا تىركەلەدى. شەشىم جاريالانعاننان كەيىن ون كۇن وتكەن سوڭ كۇشىنە ەنەدى»، - دەپ ءتۇسىندىردى قالالىق ءماسليحات حاتشىسى قۇدايبەرگەن بەكسۇلتانوۆ.

وتكىزىلگەن كوپشىلىك تىڭداۋلاردىڭ حاتتاماسى 7 جۇمىس كۇنى ىشىندە قاراعاندى قالالىق ءماسليحاتىنىڭ، قاراعاندى قالاسى اكىمدىگىنىڭ ينتەرنەت- رەسۋرسىندا ورنالاستىرىلادى جانە قالا اۋماعىندا تاراتىلاتىن باق- تا جاريالانادى. سونداي-اق وكتيابر اۋدانىن ءاليحان بوكەيحان اتىنداعى اۋدان دەپ قايتا اتاۋ ماسەلەسى قاراعاندى قالالىق ءماسليحاتى سەسسياسىنىڭ كۇن تارتىبىنە ەنگىزىلەتىن بولادى.

اۆتور: اگاتا مۋحامەدجانوۆا