كوروناۆيرۋس: قازاقستان قانداي ەلدەردىڭ ۆاكسينالارىن ساتىپ الماق

نۇر-سۇلتان. قازاقپارات – ق ر دەنساۋلىق ءمينيسترى الەكسەي سوي «حابار» ارناسىنىڭ تىلشىسىنە قازاقستان وزگە مەملەكەتتەردەن ۆاكسينا ساتىپ الاتىن- المايتىنى تۋرالى ايتتى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، ءارتۇرلى ديستريبيۋتورلارمەن، كومپانيالارمەن كەلىسسوزدەر جۇرگىزىلىپ جاتىر.

«الدىن الا كەلىسىمشارت جاساسىپ جاتىرمىز. قۇپيالىلىق شارتتارىنا بايلانىستى مازمۇنىن جاريالاي المايمىز. ءبىراق قازىر بۇل ۆاكسينالاردى قازاقستانعا جىلدام جەتكىزۋ بويىنشا كەلىسىم جۇرگىزىلىپ جاتىر. Sinovac قانا ەمەس، Pfizer، Moderna سياقتى ۆاكسينالارعا دا قاتىستى كەلىسىم جۇرگىزىلۋدە. ياعني بارلىق كومپانيامەن كەلىسىمگە كەلۋ كەزەڭىندەمىز. ولارعا ءوتىنىم جازىپ قويدىق. جاقىن ارادا ونىڭ باعاسى مەن جەتكىزۋ ۋاقىتىنا قاتىستى جاۋاپ كۇتىپ وتىرمىز»، - دەدى ق ر دەنساۋلىق ءمينيسترى الەكسەي سوي.

ايتا كەتەيىك، Sinovac ۆاكسيناسى - قىتايدا وندىرىلگەن. Pfizer ۆاكسيناسى - امەريكالىق Pfizer كومپانياسى مەن BioNTech نەمىس كومپانياسىنىڭ بىرلەسكەن پرەپاراتى. Moderna ۆاكسيناسى - امەريكالىق Moderna كومپانياسىنىڭ ءونىمى. قازىرگى ۋاقىتتا قازاقستاندا رەسەيلىك «سپۋتنيك ۆ» ۆاكسيناسى عانا قولدانىلىپ وتىر. وتاندىق KazCOVID-in ۆاكسيناسى سىناقتىڭ سوڭعى كەزەڭدەرىنەن وتۋدە.