سىناقتان ءوتىپ جاتقان قازاقستاندىق ۆاكسينانىڭ ناتيجەسى قاشان شىعادى

نۇر-سۇلتان. قازاقپارات - سىناقتان ءوتىپ جاتقان قازاقستاندىق ۆاكسينانىڭ ناتيجەسى ءساۋىر ايىندا شىعادى.

بۇل تۋرالى ق ر دەنساۋلىق ساقتاۋ ءمينيسترى الەكسەي سوي «حابار» ارناسىنە بەرگەن سۇحباتىندا ايتتى، دەپ حابارلايدى قازاقپارات ءتىلشىسى.

«ءبىز كوروناۆيرۋسقا قارسى ۆاكسينالاۋدى 1 -اقپاننان باستادىق. وسى كەزدە ەكپە جاسايتىن كابينەتتەردى ۇيىمداستىرىپ، ۆاكسينانى دۇرىس تەمپەراتۋرادا ساقتاۋ وتە ماڭىزدى. وسى ۋاقىتقا دەيىن ەلىمىزدە 59000 ادامعا ۆاكسينا ەگىلدى»، - دەيدى ق ر دەنساۋلىق ساقتاۋ ءمينيسترى الەكسەي سوي.

ونىڭ ايتۋىنشا، قازىرگى ۋاقىتتا قازاقستان ۆاكسيناسى رەسمي تۇردە تىركەلگەن برەندتەرمەن دە كەلىسىمگە كەلىپ جاتىر.

«وسى ايدا 90 مىڭ قوسىمشا ۆاكسينا جەتكىزىلدى، ەندى تاعى قوسىمشا 105 مىڭ ۆاكسينا ءوندىرىلدى. 30 مىڭ ۆاكسينانى تىكەلەي رەسەيدەن الدىق. بۇدان بولەك، كەلەسى ايدان باستاپ 600 مىڭ ۆاكسينا قاراعاندىداعى فارماتسيەۆتيكالىق زاۆودتا وندىرىلەتىن بولادى. ءساۋىر ايىندا قازاقستاندىق ۆاكسيناعا قاتىستى ناتيجە قالاي بولاتىنىن كورەمىز. ول دا قولدانىسقا ەنەتىن بولادى. ءبىزدىڭ ماقسات - كۇزگە دەيىن حالىقتىڭ باسىم بولىگىنە ۆاكسينا ەگىلۋى كەرەك»، - دەيدى ول.

اۆتور: زارينا قاھارمان