قازاقستان پرەزيدەنتى كورەياداعى حانكۋك ۋنيۆەرسيتەتىنىڭ تۇلەگىنە حات جولدادى

سەۋل. قازاقپارات - قازاقستاننىڭ كورەيا رەسپۋبليكاسىنداعى ەلشىسى باقىت دۇيسەنبايەۆ حانكۋك شەت تىلدەرى ۋنيۆەرسيتەتىنىڭ ۆيتسە- پرەزيدەنتى شين جوڭ حۋانمەن جانە ۋنيۆەرسيتەتتىڭ تۇلەگى چوي ەن سونمەن كەزدەستى، دەپ حابارلايدى قازاقپارات ق ر س ءى م سايتىنا سىلتەمە جاساپ.

ءىس- شارا اياسىندا چوي ەن سوننىڭ «تۇركىستان» گازەتىنە بەرگەن سۇحباتى جاريالانعاننان كەيىن جولدانعان پرەزيدەنت قاسىم- جومارت توقايەۆتىڭ حاتى تابىس ەتىلدى. مەملەكەت باسشىسى ماقالانى وقىپ، ونى جوعارى باعالاعان بولاتىن. ءوزىنىڭ حاتىندا ول چوي ەن سونعا جەكە ريزاشىلىعىن ءبىلدىرىپ، قازاق ءتىلىن زەرتتەپ، كورەي- قازاق سوزدىگىن قۇراستىرۋىن قولدايتىنىن جەتكىزدى.

چوي ەن سون 2019 -جىلدىڭ اقپانىندا حانكۋك شەت تىلدەرى ۋنيۆەرسيتەتىن قازاق ءتىلى ماماندىعى بويىنشا ءبىتىردى. ستۋدەنتتەرمەن الماسۋ باعدارلاماسى شەڭبەرىندە 2015-2016 -جىلدارى ءال- فارابي اتىنداعى قازاق ۇلتتىق ۋنيۆەرسيتەتىندە وقىپ، 2017 -جىلى «استانا ەكسپو - 2017» حالىقارالىق مامانداندىرىلعان كورمەسىندە كورەيا رەسپۋبليكاسىنىڭ پاۆيلونىندا قىزمەت ەتتى. قازىرگى ۋاقىتتا ول حانكۋك شەت تىلدەرى ۋنيۆەرسيتەتىنىڭ عىلىمي قىزمەتكەرى رەتىندە جۇمىس ىستەپ، قازاق ءتىلىن زەرتتەۋ مەن ونى ناسيحاتتاۋ بويىنشا ەڭبەگىن جالعاستىرۋدا. ول قازاق ءتىلىن جوعارى دەڭگەيدە مەڭگەرىپ قانا قويماي، حالقىمىزدىڭ مادەنيەتى مەن ءداستۇرىن تەرەڭ بىلەدى.

چوي ەن سون «تۇركىستان» گازەتىنە بەرگەن سۇحباتىندا قازاق ءتىلىن ۇيرەنگەنى، كورەي- قازاق سوزدىگىن قۇراستىرىپ جاتقانى، ەلىمىزدەگى وقۋ مەن ءومىر ءسۇرۋدىڭ تاجىريبەسى تۋرالى ءوز اسەرىمەن ءبولىستى. سونىمەن قاتار، ءوزىنىڭ قازاقستانعا قاتىستى بولاشاق جوسپارىن تۋرالى ايتتى.