نۇر-سۇلتاندا ءبىر توپ جىگىتتىڭ كولىك ۇرلاعان ءساتى ۆيدەوعا ءتۇسىپ قالدى

فوتو: None
نۇر-سۇلتان. قازاقپارات. - ءبىر توپ قىلمىسكەر ءبىر ءتۇن ىشىندە التى كولىك ۇرلاماق بولعان. ونىڭ بىرەۋىن ۇرلاعان ءسات ۆيدەوعا ءتۇسىپ قالدى، دەپ حابارلايدى قازاقپارات نۇر-سۇلتان قالاسىنىڭ پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

«ەلوردا تۇرعىنى پوليتسياعا بەلگىسىز بىرەۋلەر كولىگىنىڭ سالونىنا كىرىپ، جەكە زاتتارىن ۇرلاپ كەتكەنىن ايتتى. تەرگەۋ بارىسىندا انىقتالعانداي، الكوگولدى سۋسىن ىشكەن دوستار قىلمىس جاساۋعا كەلىسكەن. ءتۇن ورتاسىندا ولار وڭتۇستىك- شىعىس اۋماقتا كولىك ۇرلاماق بولعان. قىلمىسكەرلەردىڭ نازارىن «ۆاز»، «لادا» جانە باسقا ماركالى اۆتوكولىكتەر اۋدارعان. كۇدىكتىلەر ءبىر ەمەس، التى كولىك ۇرلاماق بولعان، الايدا بۇل ارەكەتىنەن ەشتەڭە شىقپادى» دەلىنگەن پوليتسيا دەپارتامەنتىنىڭ حابارلاماسىندا.

ءبىر كولىكتى بۇزىپ كىرگەن 23 جاستاعى جىگىت كولىك رۋلىنە وتىرعان. كەلەسى كوشەگە جەتكەندە كولىكتىڭ اككۋمۋلياتورى وتىرىپ قالادى. باسقا كولىك تاپقان قاسكويلەر ونىڭ اككۋمۋلياتورىن شەشىپ، ورناتادى، الايدا ماشينانى وتالدىرا المايدى. سول كەزدە ولار رەسەيلىك ءنومىرى بار كولىكتى كورىپ، ونى ايداپ كەتپەك بولادى، ءبىراق بۇل ارەكەتى دە ءساتسىز بولعان. كۇدىكتىلەر وتتى سىمداردى جالعاۋ ارقىلى ماشينانى ىسكە قوسپاق بولعان. كۇدىكتىلەر كىلتى سالوندا قالىپ قالعان گولفتى ايداپ قاشىپ كەتكەن.

الايدا قالا ورتالىعىنا جەتكەندە كولىك توقتاپ قالىپ، ونى يتەرۋگە ءماجبۇر بولعان. ولار جاقىن جەردە تۇرعان Mercedes جۇرگىزۋشىسىنەن كومەك سۇراپ، وتالدىرماق بولعان. اتالعان فاكتى بويىنشا قىلمىستىق ءىس قوزعالدى. كۇدىكتىلەر نۇر-سۇلتان قالاسى پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى.



اۆتور: گۇلزات اقجولوۆا